Moscu, RUSIA- Den un buelta straño di eventonan internacional, e compania petrolero estatal Ruso, Rosneft na final lo por bira doño di Citgo, un compania Mericano di energia cu sede na Houston, Texas.
Esaki no ta un adkisicion directo. Na su luga, depende di e capacidad di e compania petrolero estatal di Venezuela, pa paga su prestamo na Rusia. E empresa Venezolano PDVSA ta doño di Citgo, cual a wordo uza como garantia pa e prestamo.
Legisladonan, tanto Republicano como Democratanana ta hopi alarma. Den e cartanan redacta na e administracion di Trump den e ultimo dianan, miembronan di Congreso y Senado a adverti cu esaki por ta un problema grandi di siguridad nacional di Merca, si Rusia adkeri Citgo.
“Nos ta bastante preocupa cu e posibel control di Rosneft di un proveedor importante di energia di Merca, caul lo por nifica un menasa grandi pa e siguridad energetico di Merca, por afecta e fluho y e prijs di gasoline pa consumidonan Mericano y expone e infrastructura critico di Merca y tambe amenasa di e siguridad nacional”, segun un grupo di senadornan Mericano, encabesa pa e Republicano Marco Rubio di Florida y e democrata Bob Menendez di Nueva Jersey
Tur esaki ta suma na e tension halto entre Rusia cu Merca relaciona cu e conflicto na Siria, delicuencia cibernetico y e metemento di Rusia den eleccionnan Mericano, entre otro. Actualmente Rosneft tambe ta ariba e lista Mericano di sancionnan pa a “viola leynan internacional y pa promove e conflicto na Ucraina”.
Henter e situacion aki ta deriva for di e hecho cu Venezuela ta desespera pa placa efectivo ultimamente. E compania estatal petrolero Venezolano, Petroleos de Venezuela (PDVSA) ta doño di Citgo for añanan 1980. A cambio di un prestamo for di Rosneft na December, e compania estatal Venezolano a pone un cantidad grandi di su stock (49.9%) di Citgo como borg.
Si PDVSA no por paga su recibonan na tempo, Rosneft mas sigur lo tuma control di Citgo over. Tur loke Rosneft lo mester haci ta cumpra un paar di stock mas pa pasa e 50% pa asina bira doño di Citgo.
“Rusia lo beneficia hopi di un transferencia di activonan di PDVSA-Rosneft-Citgo den disminucion di e interesnan di Merca”, segun e congresista Republicano Jeff Duncan y e congresista Democrata Albio Sires den un carta na e secretario di Tesoreria Mericano, Steve Mnuchin. “Nos ta urgi bo atencion inmediato y revision di e asunto aki”.
Mnuchin ta presidente di e Comite di Inversion Extranhero di Merca, cu ta determina si adkisicion di companianan Mericano dor di companianan stranhero lo ta un bon idea.
Aunke cu Venezuela of PDVSA lo no keda sin placa di inmediatio, ta existi e posibilidad cu esaki lo por sosode na final di 2017. Esaki lo nifica cu PDVSA lo no por paga e prestamo Ruso.
Esaki lo no sosode e siman aki, segun Fransisco Monaldi di Rice Universidad den Politica Energetico Latinoamericano, pero nan lo por faya den nan proximo pago grandi na November of December.
Rusia tin un historia di hunga politica cu e suministro di gas y petroleo. El a yega di corta e suministro di gas natural pa Ucraina na varios ocasion ora cu e no ta contento cu e desaroyonan eynan. E ta un di e razonnan mas importante pa cual Europa ta purba di kita su dependecia di gas Ruso pa motibo di preocupacionnan ariba nivel di siguridad.
Sinembargo, aunke cu Rosneft haya e control di Citgo, no ta probabel cu Rusia lo por haci mucho pa haci daño na e prijsnan di petroleo y gas Mericano.
“Rusia no por secuestra Merca”, segun John LaForge, un experto den energia y director di strategia di Real Assets na Wells Fargo. Ela bisa cu Citgo ta controla casi 800 mil bari di crudo diario.
Mientras cu e cantidad no ta chikito, esaki ta solamente un parti di e casi 20 miyon bario di petroleo cu Merca ta consumi riba base diario. Si Rosneft stop di rafina petroleo na e tres refeinerianan di Citgo na Merca, LaForge a bisa, otro refinerianan lo ta mas cu dispuesto pa haci esaki”.
Fuente: www.cnnmoney.com