BEIJING, China – E minister di Finansas di China, Xiao Jie, kende a asisti na e reunion di G-20 di siman pasa, a adverti cu e impulso bisto pa economia global por ta frena pa e incertidumbrenan politico y e aumento di proteccionismo.
E ministernan di Finansas y bankeronan central di G-20 a bisa den un comunicado emiti tras un reunion den e localidad Aleman di Baden-Baden, cu a bandona e promesa di mantene e comercio global liber y habri, cediendo dilanti un Merca, cada biaha mas proteccionista.
Na su luga, simplemente nan a haci un referencia simbolico na comercio den su comunicado principal, ora di bisa cu G-20 lo traha en conhunto pa fortalece e contribucion di comercio na su economianan.
“E mercadonan ta preocupa pa e politicanan incierto di algun economia desarya y ta preocupa pasobra e aumento di proteccionismo por afecta negativamente e recuperacion economico (global),” Xiao a bisa den un mensahe publica dialuna pa e banco central Chines, caminda cu e no a identifica e economianan desaroya.
Por lo contrario, den un reunion realisa den e ciudad Chines di Hangzhou na September di aña pasa, lidernan di G-20 a acorda di traha mas duro pa construi un economia mundial habri, rechasa proteccionismo y promove comercio y e inversion den mundo.
Pa sigura e recuperacion continuo di e economia mundial, paisnan mester aplica concientemente na e resultadonan di e cumbre di Hangzhou, fortalece e coordinacio di politicanan macroeconomico, continua promove comercio y inversionnan mundial y opone na tur e formanan di proteccionismo, Xiao a bisa.
Den e mesun mensahe aki, e gobernador di e Banco Popular di China, Zhou Xiaochuan, kende tambe tabata na Baden-Baden pa e evento di G-20, a bisa cu e economia di e pais Asiatico tabata den bon forma y a reitera cu e politica monetario lo sigui ta prudente y neutral.
Fuente: Reuters