MILAN, Italia – Fiat Chrysler Automobiles (FCA) a bisa cu el a asocia cu e gigante Mericano di comercio electronico, Amazon, pa bende auto online cu descuentonan adicional.
Den un comienso, solamente cumpradonan Italiano por adkiri nan auto cu un simpel click y e ofertanan riba Amazon.it lo ta limita na tres modelo, e 500, Panda y 500L.
FCA a afirma cu e eleccion aki tabata delibera debi cu Panda ta e auto mas bende di Italia, mientras cu cumpradonan di e modelonan 500 y di su version di mayor tamaño, 500L, ta representa e naturalesa hoben y aventurero cual nan ta purbando pa yega cu e iniciativa aki.
“A yega e momento pa duna na e consumidornan un forma nobo, mas eficiente y transparente, di eligi un vehiculo nobo,” Gianluca Italia, a comenta, kende ta responsabel pa Fiat Chrysler na Italia, durante un conferencia di prensa online.
E gerende di e di shete automotriz mas grandi di mundo a bisa cu e asociacion lo ta atractivo pa cumpradonan cu ta busca oferta desde e comodidad di nan cas y a agrega cu e promocionnan cu ya ta existi por mehora hasta na un tercio.
El a añadi cu investigacionnan a revela cu e mita di e Italianonan lo ta dispuesto pa cumpra un vehiculo online, pero cu un 97 porciento ainda ta prefera di adkiri atrabes di un concesionario tradicional.
Por lo tanto, despues di a haci nan pedido online, e clientenan lo wordo contacta pa amazon pa dicidi riba un concesionario unda nan por finalisa nan compra y retira e vehiculo, cu mester ta cla pa entrega den un plazo di dos siman.
Fuente: Reuters