BERLÍN, Alemania – E confianza di inversionistanan den e zona Euro a mehora mas di lo spera na April pa mantene nan mes riba su maximo nivel den casi 10 aña, segun datonan reporta dialuna, lagando atras e riesgonan liga na e eleccionnan presidencial na Francia.
E indice pa e zona Euro di e grupo di investigacion Sentix, cu sede na Frankfurt, a subi na 23,9 punto, su maximo nivel desde Augustus 2007. Esaki a supera e pronostico promedio di 21,0 punto den un sondeo di Reuters na analistanan.
Luna pasa, e indice a subi na 20,7, desde 17,4 na Februari na disipa e temornan cu e riesgonan politico global por caba cu e recuperacion economico.
“E zona Euro a emancipa di e tendencianan global, ora cu e valoracion di e otro regionnan di mundo ta completamente inekiboca,” Sentix a bisa den un comunicado.
“E zona Euro ta sigui haci avancenan economico. Prome cu e eleccionnan importante na Francia, e indice riba e actual situacion di e economia di e zona Euro a subi na su maximo nivel desde Januari di 2008,” el a agrega.
Francia lo eligi un presidente nobo den un votacion di dos buelta na April y Mei. E candidato centrista Emmanuel Macron ta e faborito pa gana e eleccionnan contra e lider di e partido di extrema derecha Frente Nacional, Marine Le Pen.
E plannan di Le Pen di sali for di e Euro y celebra un referendum riba Union Europeo a spanta hopi inversionista cu tin miedo di un “Frexit” despues cu e Britanico a dicidi aña pasa pa sali for di Union Europeo den un referendum.
Fuente: Reuters