BOGOTÁ, Colombia – Colombia ta apunto di caba cu e exportacio di 500 miyon di flor pa Merca, pa e fiesta di San Valentin, un 15 porciento di su produccion anual di flor, un dirigente di e principal gremio di e sector, a informa diabierna.
E pais Sur Americano ta e principal proveedor di flor pa Merca y di dos na nivel mundial despues di Hulanda. E mayor volumen di despacho di flornan Colombiano ta wordo haci pa e fiesta di San Valentin.
E exportacionnan Colombiano di flor ta totalisa e aña entre 1300 y 1400 miyon di dollar. Na 2016, Colombia a exporta 225 mil ton di flor, e produccion mas halto den casi un decada, di acuerdo cu e ministerio di Agricultura.
“E floricultura Colombiano continuamente ta renobando, tratando di ofrece e miho variedad y e miho calidad,” e presidente di e Asociacion Colombiano di Exportadonan di Flor, Augusto Solano, a bisa Reuters.
E dirigente a sigura cu Colombia ta exporta 1600 variedad di flor pa Merca, principalmente rosa, pompon, clavel, astromelia y bouquet. Ecuador ta e principal competidor die rosanan Colombiano den e temporada di San Valentin.
E industria di flor ta genera 130 mil trabao na Colombia, mayoria di nan hende muhe, di acuerdo cu Asocolflores. E pais Sur Americano tin 7500 hectarea cultura cu flor y foyahe.
E flornan cu ta wordo exporta pa San Valentin desde Colombia ta wordo despacha den avion te cu e aeropuerto di Mami y desde e ciudad ey e ta wordo distribui a lo largo y hancho di Merca.
Fuente: Reuters