BOGOTA, Colombia – E minister di agricultura y desaroyo rural, Aurelio Iragorri Valencia, a informa dialuna cu autoridadnan sanitario di China a confirma cu Colombia ya tin luz berde pa exporta carni di baca pa e pais aki.
E confirmacion a wordo haci pa e director di e Oficina di Veterinaria di e ministerio di Agricultura di e Republica Popular Chines, Wang Gongmin, kende a anuncia cu Colombia ta cumpli cu e seis rekisitonan exigi pa comercio internacional di e producto aki.
“Esaki ta un excelente noticia pa e diversificacion di e exportacion di e productonan agropecuario, cu ya a cuminsa na mustra crecementonan importante. Nos ta habriendo mercado y awo e reto ta pa e ganaderonan, kendenan mester aumenta inventario pues si nos logra e apertura di e mercado Chines pa carni Colombiano, e 23 miyon di baca cu e ganadero Colombiano tin, no lo alcansa ni pa alimenta Beijin,” e minister a bisa.
Dentro di e rekisitonan evalua pa autoridadnan sanitario di China, ta e situacion di e criaderonan di baca, e proceso di vacunacion di e keintura aftoso, control di campo di e animalnan, e proceso di sacrificio, mescos cu e produccion di vacunanan na Colombia.
“Riba e mesa di e famianan Chines, e Carni Colombiano ya ta cerca,” Gongmin a agrega, kende a manifesta igualmente cu su gobierno tin un interes halto den apoya Colombia den e investigacion riba e sanidad animal. Ademas, e funcionario a splica cu den un luna aproximadamente lo manda e evaluacion riba e bishita y lo notifica e admisibilidad pa carni di baca Colombiano.
Di su parti, e gerente general di ICA, Luis Humberto Martinez Lacouture, a cualifica e aprobacion como un “gran logro pa e ganaderonan di e pais.”
“Ta un avance clave den e conkista di e mercadonan internacional, mercadonan exigente y cu lo permiti Colombia confirma su potencialidad exportador y e status sanitario cu e pais ta conta cun’e,” Martinez Lacouture a indica.
E rekisitonan cu a wordo verifica den e bishita tecnico ta ubica den predionan di Cundinamarca y Cordoba, mescos cu Puerto de Cartagena y den e Laboratorio di Diagnostico Veterinario di ICA, na Bogota.
Fuente: El Espectador