LONDON, Inglatera – E careda pa e creacion di avionnan mas lihe ta andando. Sin embargo, hopi poco di e propuestanan actual ta parce di ta cerca di desaroya un prototipo cu lo bira realidad. Te awor aki. E compania Boom Technology, ta pretende cambia cu su proyecto nobo e forma den cual nos ta biaha. Su apuesta ta un avion cu ta bula 2,2 biaha mas lihe cu e velocidad di zonido, na mas di 2400 kilometer pa ora y cu por crusa Oceano Atlantico den menos cu cuater ora. E velocidad aki por bay 2,6 biaha mas lihe cu un aerolinea actual standard y recore asina e distancia entre San Francisco y Tokyo den cinco ora, na luga di e 11 ora habitual. Ademas, e proppuesta aki ta conta cu un apoyo extra: e respaldo di e magnate Britanico y fundador di Virgin Group, Richard Branson. Cu tur e ingredientenan aki, Boom Technology a anuncia cu nan por tin un prototipo real di e avion pa final di 2017.
E ticketnan lo por costa 5000 dollar. “Un prijs alcansabel,” segun e compania. E compania aki a firma un colaboracion di 2 mil miyon di dollar cu Virgin Galactic, un empresa subsidiario di Virgin Group. “Nos ta confirma cu nos lo bay provee servicionan di ingenieria, diseño y fabricacion na e proyecto di Boom Technology”, un vocero di e compania aki a splica na e corant Britanico The Guardian. Dentro di e acuerdo ta inclui e opcion cu Branson ta keda cu 10 avion pa su sociedad Spaceship Company. Den otro palabra, e multimiyonario ainda no a cumpra ningun avion, pero ta keda cu e opcion di adkiri 10 di nan si tur cos sali manera planea.
Un di e clavenan di Boom, manera cu nan a yama e prototipo, ta e costo di e pasashinan: 5000 dollar. Segun palabranan di Blake Scholl, fundador y director di e proyecto: “Nos ta papiando di e prome avion supersonico caminda cu hende por permiti su mes bula.” Scholl a defini e prijs aki como “practicamente mescos” cu e costo di biaha den business class.
Na 1973, e Mach-2 Concorde di Airbus a debuta y a bula Atlantico den tres ora y mey. Mundo a pensa cu eynan tabata e respuesta di e biahenan aereo hiperlihe. Sin embargo, cuater decada mas despues, nada a cambia. Concorde a wordo desmantela, den gran parti debi na e aumento di e costonan di mantenimento cu a provoca cu e prijs di cada pasashi a alcansa 20 mil dollar.
E clave pa un pasashi di Boom costa cuater biaha menos ta den e avancenan tecnologico di carbon fiber, cu ta permiti e ekipo di Scholl construi e avion un 30% mas eficiente den combustibel compara cu e Concorde, segun e director di e proyecto. E avion nobo aki lo tin solamente 40 asiento, separa den dos fila, cu e obhetivo di cada pasahero tin bista directo riba “e curvatura di planeta Tera.”
Fuente: El Pais