SIDNEY, Australia – E bononan, oro y yen a subi diabierna na Asia y e bolsanan di e region ta cay mientras inversionistanan ta busca activonan sigur despues cu Merca manda misilnan crucero contra un base aereo na Siria, loke ta aumenta e riesgo di un choke cu Rusia y Iran.
E presidente Mericano, Donald Trump, a ordena e atakenan di diahuebs contra un base aereo controla pa e forsanan di e presidente Sirio, Bashar al-Assad, como represalia pa un atake kimico lansa desde e base ey diamars, cu a causa morto di por lo menos 70 persona.
E Observatorio Sirio pa Derechonan Humano a bisa cu e atake casi a distrui e base aereo cerca di Homs y e gobernador di e ciudad a bisa cu el a laga cinco morto y shete herido.
“E accion ta agrega un complehidad na e geopolitica cu no a existi prome, dado e apoyo di Rusia na Siria y e promesanan pre-electoral di Trump riba trata di drecha e relacionnan cu (e presidente Ruso Vladimir) Putin,” Michael Weson, analista di CMC Markets na London a skirbi den un nota.
E indice MSCI di accionnan Asiatico pafo di Hapon a cay un 0.4 porciento despues di retrocede mas tempran un 0.85 porciento, na un minimo den dos siman y mey. Na Hapon e indice Nikkei di e bolsa di Tokyo a subi un 0.4 porciento.
E indice dollar, cu ta sigui e desempeño di e moneda Mericano contra un canasta di seis divisa importante, ta afirma na 100,63. Frente na e moneda Hapones, e dollar a modera su perdidanan na 110.635 yen. E euro a cotisa na 1,0651 dollar.
Riba e mercadonan di materia prima, e oro a conta cu lo agrega un 1,2 porciento, na 1.262.46 pa ons, despues di a subi mas tempran na su nivel di mas halto desde dia 10 di November.
E futuro di petroleo na Merca lo subi un 1.6 porciento, na 52,50 dollar pa bari y e crudo Brent di London lo a suma un 1,4 porciento na 55,66 dollar pa bari.
Fuente: Reuters