Sr. Andres Ras, Operations Manager di Eco Tech ta splica cu Eco Tech ta contribui cu City Inspector pa asina mantene Aruba limpi, mirando cu nan ta un compania cu ta traha pa bienestar di Aruba tambe.
E contribucion aki lo no ta suficiente pa tur e sushi cu lo keda atras despues di e parada, y Eco Tech ta duna nan “granito” pa yuda mantene e luga limpi. Si tur hende, particular duna su aporte, y tur tin un solo meta, ta pa mantene Aruba limpi.
Eco Tech lo keda duna City Inspector e sosten, esey ta pa cuminsa. Unda cu por piki sushi, lo haci esaki. Pero tin companianan local y priva, cu ta pidi pa duna servicionan adicional tambe.
Sr. Marlon Pietersz, di Bureau City Inspector ta splica cu tur departamento, tur compania, tur NGO’s, kier duna un man, City Inspector ta tuma esaki cu man habri. Eco Tech tur aña ta coopera cu e actividadnan aki. Tin otro companianan di gobierno, cu tambe ta yega. City Inspector ta sumamente agradecido, y ta spera cu por sigui conta cu e cooperacion aki pa full e aña. Por spera cu nan lo bati na nan porta pa Semana Santa, y ta spera di sigui conta cu nan cooperacion.
Tin Serlimar, y tambe un partido politico ta yuda parti saconan di sushi. Esaki no ta suficiente pa henter e temporada di Carnaval, cu semper ta laga un cantidad di sushi atras. Sr. Marlon Pietersz, City Inspector no kier zona negativo, tur e paradanan cu tabata tin, e publico a comporta nan mes masha bon.
Ta masha poco sushi mester a wordo recogi despues di e paradanan. Si mester bisa, cu e wiel di limpiesa mester keda bati den hende nan cabes, pa tene Aruba limpi, como un estilo di bida. E sistema no ta dura di awe pa mañan. Pero den un futuro e mester por ta asina, segun Sr. Marlon Pietersz, di Bureau City Inspector.