Por medio di e comunicado aki, Director di departamento di Obra Publico y Mota -Engil ta informa tocante e ultimo desaroyonan ariba e proyecto di Watty Vos Blvd.
Diasabra anochi a habri e rotonde di Guardian Group. Naturalmente den transcurso di siman lo caba di completa e rotonde pa loke ta trata e ramenstrook, e lomba di cachonan y traha e banchinan paden di e rotonde. Alabes a habri e caminda di Juancho Irausquin Blvd for di rotonde di Guardian Group te cu rotonde di Alhambra y for di rotonde di Guardian Group te cu rotonde di Ling & Sons tambe ta habri.
Tambe a cuminsa mira accion di marcamento di caminda ariba ful e proyecto di Watty Vos Blvd.
Loke ta cera ainda ta e rotonde di Noord, e viaducto na Hato y pronto lo cera e viaducto na Meiveld pa asina por caba di asfalta e caminda bou di e viaductonan.
DOW ta lamenta cu na rotonde di Noord a surgi un problema na momento cu e duiker a collapse. Mester bisa si cu e duiker tin mas di 50 aña desde cu el a ser construi. Awor e contratista Mota-Engil lo mester bay reconstrui e duiker completamente. E rotonde ta 3/4 kla, pero nos no por habriele ainda pa motibo cu e duiker ta situa bou di e rotonde direccion Oranjestad. Pa reconstrui e duiker akinan lo bay dura mas o menos 6 siman y pa es motibo lo no por bay habri e rotonde di Noord completo.
Mañan diahuebs, scolnan ta cuminsa y desviacion di Noord ta lo siguiente:
Desviacion den tur direccion (Noord, Palm Beach, Oranjestad, Sabana Liber) ta via e caminda provisionalnan:
– Pafor di rotonde Noord
– Tegenover di Misa Santa Anna
– Ex-Rio Grande
Por ultimo, DOW ta pidi pa automobolistanan pa absolutamente no core nan vehiculo ariba e viaductonan. Viaductonan Meiveld y Overpass Hato ta dos area cu ainda ta bou di construccion.
En conexion cu e trabou menciona Departamento di Obra Publico, Mota – Engil y KPA ta pidi pa tene cuenta cu e inconveniencianan y ta gradici pa e comprencion y cooperacion.