E tata spiritual di persecucion politico na Aruba ta Gabinete Eman y AVP

0
RBC Juli 2018
Funmiles-2018

Un di e parlamentarionan di AVP cu ultimo tempo ta cuestiona e gobierno actual riba persecucion politico ta Sr. Mike Lampe. Sinembargo den su ignorancia, te ainda despues di 2 luna, e politico aki no kier comprende cu e retiro di e mas di 300 coordinadornan cu partijdiploma a ser ocasiona door di su propio lider di AVP kende a dicidi dia 29 october 2013 cu tur e batayon di coordinadornan cu a bin cu su gobierno, ta bay cu su gobierno (“voor de duur van het kabinet Mike Eman II”). Y esaki ta e decision cu e gobierno actual ta ehecutando cabalmente. Pero ta bon pa recorda sr. Lampe cu den historia di pais Aruba e tata spiritual di persecucion politico ta partido AVP. No solamente nan a persigui contrincantenan cu tin un otro color politico, pero tambe profesionalnan trahando den gobierno cu tabata haci nan trabao manera debe ser.

Persecucion politico
E masacre di persecucion politico contra hendenan di MEP a cuminsa ora cu AVP a drenta gobernacion na 1986. E tempo ey nan a manda cientos di trahadornan humilde di TAV cas, kendenan tabata gana un salario humilde pa cria nan famia. Tambe personanan nombra oficialmente na varios departamento di gobierno y pa cual tabata tin vacatura habri den e Aruba nobo cu su Status Aparte a wordo manda cas per direct, esta riba e prome dia di trabao na 1986. Politiconan di MEP trahando pa gobierno a wordo corta den nan schaalnan. Directornan di departamentonan y tambe na Hulanda (Arubahuis) a pasa mal rato na man di e gobierno burdugo di AVP. E persecucion tabata asina grandi cu te hasta e ex-Director di Asuntonan Economico mester a bay 10 biaha pa Corte pa para e burdugonan cu cueste loke cueste kier a elimin’e como director. Y asina tin hopi otro caso mas.

Persecucion contra profesionalnan
Pero no solamente a practica persecucion politico, pero AVP a persigui tambe profesionalnan Arubiano bon capacita cu tabata traha na Departamento di Impuesto. Asina por a mira con e Inspector y Ontvanger di Belastingen a wordo kita for di trabao inhustamente, ya cu nan a cumpli cu nan deber di cobra e placa di BBO cu refineria Valero debe pais Aruba y esaki basa riba un sentencia di hues cu a obliga Valero di paga 280 miyon florin, pero Gabinete Eman tabata kier pa e multinational aki wordo exonera. Tambe otro profesionalnan Arubiano trahando na Departamento di Finansa a wordo cori ya cu den e mente maligno di e ex-ministro di Finansa di AVP supuestamente nan lo a leak informacion pa prensa. Hecho ta cu finalmente tur e profesionalnan aki a gana nan caso dilanti hues, pero e gobierno di AVP no kier a reinstitui nan den nan funcion. Increibel con criminal e gobierno di AVP ta actua ora cu nos propio profesionalnan Arubano!

Mas ehempel di persecucion
Un otro ehempel bibo di persecucion politico tabata ora cu ex-ministro Sevinger manera ladron den anochi ta laga basha un kiosco di un Arubiano den Caya Betico Croes, pasobra e ciudadano aki ta aparece riba lista di MEP. E tempo ey den Corte hues a declara cu e gobierno di AVP ta mina y zaag na e pianan di nos estado di derecho. Un declaracion hopi fuerte den direccion di un gobierno abusado.
Un otro forma di persecucion practica pa AVP ta e persecucion contra nos trahadornan local, ya cu ta hustamente e gobierno di AVP mediante e ex-Ministro Paul Croes a percura pa firma mas di 2000 ontheffingen pa trahadonan di exterior y asina a perhudica mas di 2000 mama y tata di famia riba e isla aki pa haya un trabao pa cria nan famia. Siguramente bao di tur e 2000 ontheffingen lo tabata tin funcionnan tambe cu nos hobennan lo por a ocupa ya cu e desempleo bao di nos hobennan ta haltisimo, esta mas di 25%. Lo ta bon pa Mike Lampe cu ta pretende di sali na defensa di nos hobennan puntra Paul Croes dicon su maneho y di AVP tabata dirigi contra nos hobennnan?
Finalmente, esakinan ta djis un parti chikito di tur e persecucionnan practica pa e gobiernonan di AVP y si ta necesario partido MEP lo bin cu e di dos parti tambe y p’asina Mike Lampe keda na altura di e pasado tristo di AVP pa tur loke ta nan persecucion contra di nos Arubianonan.

Comments

comments

C: Heineken
new india