LONDON, Inglatera – Gran Britania a cuminsa formalmente diaranson e proceso di divorcio di Union Europeo tras di 44 aña di miembresia, cumpliendo cu e decision tuma pa e votantenan Britanico den un referendum nuebe luna pasa.
E representante di Gran Britania pa Union Europeo, Tim Barrow, a entrega den man di Donald Tusk, presidente di e Conseho Europeo, un carta firma pa May diamars den su oficina di 10 Downing Street, cu a inicia formalmente e proceso di negociacion di dos aña cu lo culmina cu e Brexit.
“Esaki ta un momento historico sin marcha atras,” e prome minister, Theresa May a bisa na e legisladornan Parlamento, minuutnan despues di a acoge oficialmente Articulo 50 di e Tratado di Lisboa. “Awe Gobierno ta actua pa e boluntad democratico di e pueblo Britanico.”
Den un mensahe riba Twitter, Tusk a bisa: “Tras nuebe luna, Gran Britania a cumpli.” E funcionario a compaña e publicacion cu un potret di Barrow entregando e carta dilanti di banderanan Britanico y comunitario na Brussel.
“No tin rason pa fingi cu esaki ta un dia feliz,” Tusk a señala mas despues den un discurso, caminda cu el a enfatiza cu e prioridad awo ta pa minimalisa e costo pa ciudadanonan Europeo y e paisnan miembro.
Pa 52% di e votantenan Britanico cu a vota na fabor di e salida di e pais di Union Europeo Juni ultimo, esaki ta un momento di celebracion.
“Den mi opinion, esaki ta e momento mas importante den e historia Britanico moderno,” Brendan Chilton, secretario general di e grupo proBrexit Labour Leave, a manifesta.
“Finalmente nos a cuminsa e proceso e pakico nos a sali for di Union Europeo, nos ta restaura nos Parlamento y nos lo bolbe ta un nacion soberano.”
Pa esnan cu a haci campaña pa keda den e bloke, ta ora di lucha pa un acuerdo di divorcio cu ta mantene loke nan ta considera beneficionan clave di miembresia di Union Europeo, incluyendo liber comercio di bienes y servicio y e derecho na biba y traha den cualkier pais di e bloke.
“E guera falso a caba,” Joe Carberry, codirector di e grupo di pesion proEuropeo Open Britain, a bisa, agregando cu e pais a dicidi cu e lo sali di Union Europeo, pero “e tema di con nos lo sali y e control y ekilibrionan democratico a lo largo di e proceso di negociacion, ta sigui ta sin resolve.”
Pa Jean-Claude Juncker, presidente di e Comision Ehecutivo di Union Europeo, e marcha di Gran Britania ta “un fracaso y un tragedia.”
Den e carta cu a activa e proceso, May a bisa cu tanto Gran Britania como Union Europeo mester taha duro awo pa sigura cu tin un acuerdo.
“Nos mester compromete nos di forma constructivo y respetuoso, den un espiritu di cooperacion sincero,” e dirigente a skirbi.
Lidernan Europeo, di nan banda, a mustra nan consternacion. E prome minister Danes, Lars Loekke Rasmussen, a señala cu e ayo di London for di Union Europeo ta “increiblemente tristo” y cu ta spera “hopi ups and downs na caminda.”
Tras di decadanan di expansion, pa Union Europeo ta desestabilisador perde un di su miembronan di mas importante, specialmente mientras e lucha pa contene un ola di nacionalismo y populismo y ta enfrenta un antipatia sin precedente di e huurdo nobo di Cas Blanco, Donald Trump.
E situacion ta ainda mas incierto riba suelo Britanico. Hopi empesa tin miedo di e impacto di bandona e vasto mercado comun di Union Europeo, cu mas of menos 500 miyon di persona. Brexit tin implicacionnan profundo pa e economia Britanico, pa e sociedad y incluso pa su union como pais. E divisiva decision di bandona Union Europeo a duna impulso nobo pa e movimiento independentista Escoses y a mina e basenan di acuerdo di paz di Noord Ierland.
Fuente: Associated Press