E Snoanan Historico di Tunisia

Interior di Snoa El Ghibra den e aldea di Hara Sghira na Djerba, Tunisia.

Skirbi pa Clyde Harms

Tempo cu nos tabata biba na Libia mi señora a lesa di e snoanan hudio historico na Tunisia y el a bin cu e proposito di bishita algun. Beatriz, yiu di Sr. Emilio Lopez-Henriquez y Sara Esther Salas tabata Hudiu Sefardito di nacemento y a crece como miembro fiel di e snoa ” Tempel Emanuel”, e snoa di e comunidad Sefardito Reforma (Liberal) di Corsou.

Na 1947 e famia Lopez-Henquez a muda pa Aruba caminda mayoria di e Hudiunan tabata Ashkenazim ethnico kendenan tabatin custumbra y ritualnan diferente di e Sefarditonan. Beatriz no a sinti su mes na cas cu e tradicionnan Ashkenazico y el a stop di asisti servicionan religioso na Aruba. Pero despues cu nos a casa caminda cu nos haya un oportunidad durante nos biahenan pa atende un servicio di un snoa Sefardita Reforma e tabata drenta y ami tabata compañe.

Pa un stranhero traha na Libia e mester a presenta prueba di afiliacion na un religion caminda e tabata biba. Esaki tabata pa exclui hudiunan. No tabata existi e mes un exigencia pa e señoranan ya cu gobierno tabata presumi cu nan tabata di e mes religion cu nan casa, pero nos a wordo adverti cu Libia no ta tolera ningun trahado stranhero casa cu un hudiu. Ni nos miho amigonan tabata sa cu Beatriz tabata hudiu. E hudaismo di Beatriz a keda un secreto pa tur e shete añanan cu nos a biba na Libia y e aña despues cu nos a pasa na Dhahran, Arabia Saudita, caminda e ley discriminatorio contra e hudiunan tabata ainda mas estricto.

Ora cu Beatriz a haya sa cu tur e snoanan hudiu historico na Tunisia tabata Sefardito y cu algun ainda tabata activo el a keda masha intriga y su gana di bishita nan tabata crece tur dia. Asina nos a dicidi di tuma un siman di vacantie na 1972 pa haci un peregrinahe historico na Tunisia cuminsando na Tunis, e capital.

Snoa Beth Mordekai, e snoa mas grandi di Tunis, tin un historia di hopi siglo. Di pafo e edificio ta bunita, pero paden e ta masha austero y el a desapunta nos. Nos a dicidi di laga Tunis y bay pasa mas tempo den e snoanan di e pueblonan chikito y nos a tuma direccion di e peninsula Djerba.

Tres aña prome Beatriz y ami a bishita Djerba como turista comun, interesa mas den souvenirs y saca potret pa manda pa nos famianan na Aruba. E tempo ey nos no tabata sa di e famoso Snoa El Ghibra. Loke a capta nos atencion tabata e damanan Aleman cu tabata drumi topless riba e beach di un pais Musulman y laga e awa di Mediterraneo refresca nan curpa.

Snoa El Ghibra, ubica den e pueblito Hara Sghira ta data casi tres mil aña y e ta e snoa mas bieu di Africa.
Den e pueblo ta biba apenas mil hende pero tur aña miles y miles di hudiu, mayoria di Francia y Israel, ta haci un peregrinahe pa El Ghibra. Nan ta hendenan cu a yega di biba na Hara Sghira of nan descentientenan. Na aña 2000 mas di dies mil a participa den e peregrinahe cu ta consisti di varios actividad. Uno cu a impacta nos ta e tradicion di skirbi un deseo riba casca di un webo herbi duro y pone e webo banda di un piedra cu a bin di Jerusalem mas di 26 siglo pasa.

Despues di Djerba nos a sali rumbo pa Gabes y Sfax caminda nos tabata spera di bishita varios snoa historico y interesante pa diferente rason. E gran snoa El Hamma di Gabes, mescos cu El Ghibra na Djerba, tambe tabatin su murayanan di paden cubri cu centenares di mosaic colorido di Marocco.

Sfax, un tempo tabata capital economico di Tunisia, pero na 1972 e poblacion tabata apenas shen hende, resultado di e opresion y actonan di vandalismo. Aki nos tabatin un experiencia inolvidabel. Den e snoa Beatriz a topa un señora cu tabata biba aya y despues di combersa un poco tabata obvio cu nan a forma un relacion amistoso y nan a cuminsa papia na serio di celebracion hudiu di Pesach, e festival di Pasco Grandi.

Na dado momento Beatriz a confie cu e secreto cu e tambe ta un Sefardito, originalmente di Corsou bibando awor na Tripoli. “Ay ta pica”, e amiga a bisa, “na Tripoli abo lo no por observa Pesach. Permiti mi duna bo algo cu lo recorda bo di bo pasado” y el a pasa Beatriz un cahita di Matzo, e pan sin levadura cu e Hudiunan ta come tradicionalmente durante Pesach. Gradici y felis nos a accepta e regalo y inmediatamente nos a sconde prome cu nos crusa frontera di Libia y el a keda scondi te ora cu nos a drenta nos cas.

E anochi ey nos a refleha riba nos biahe y naturalmente nos a compara loke nos a mira cu loke nos tabata conoce caba. Nos pensamentonan a bay Mikvé Israel na Punda, e snoa mas bieu di hemisferio occidental cu edad di mas di 300 aña.

Su preekstoel di palo cu a bin di Europa ta un obra di arte. E vloer di santo tabata pa recorda e creyentenan di e añanan cu e Hudiunan biblico a pasa den desierto.

Nos a conclui cu nos trip pa Tunisia definitivamente tabata balelapena. E snoanan tabata bunita cu historianan importante y tradicionnan cu no por bay perdi. Pero na fin di dia, loke nos tabatin na Corsow tambe ta precioso, yen di tradicion y mes importante historicamente.

Comments

comments