Diahuebs 28 di juni Gobierno di Aruba, Ministerio di Infrastructura y Medio Ambiente ta publica e strategia (beleidsnota) di naturalesa y medio ambiente cu e tema ‘Ons Natuur & Ons Milieu, Op weg naar een evenwichtige toekomst’ . Un maneho pa aña 2018 te cu 2021. E maneho a wordo diseña por medio di colaboracion di departamentonan y Ministerio, pa cual Directie Natuur en Milieu (DNM) a lidera e proceso inicia den 2014. Na aña 2018 Ministerio a implementa un metodo adicional yama SWOT y a haci algun adaptacion y revision pa reforsa e plan.
E nota ta uno dinamico y destina pa e periodo di 2018 pa 2021. Importante pa indica cu durante e trayecto di e nota a consulta diferente actor. Asina iniciando e trayecto unda cu Ministerio lo sigui cu e conversacionan cu diferente actor pa locual ta medio ambiente y pa asina ta na altura di e diferente perspectivanan existente y siña di esaki. E aspect dinamico ta haci cu e plan ta mas realistico considerando cu cambionan globalmente ta tumando lugar hopi mas liher. E plan aki por wordo adapta a base di e perspectivinan cu wordo comparti cu ministerio.
Interesante pa trece dilanti ta cu a uza un metodologia di SWOT, unda a haci un analisis di ‘Strengths’ (Forsa), ‘Weaknesses’ (Debilidad) , ‘Threats’ (Peliger) y ‘Opportunities’ (Oportunidad). Na promer instante a enfoca riba un acercamento pragmatico y a scoge 4 tema di prioridad pa asina den un siguiente trayecto enfoca riba e otro temanan defini. A base di SWOT a formula strategianan y a transforma esaki den accionan concreto.
Den e maneho balans y colaboracion entre tur partido envolvi ta temanan sumamente importante. E tema di medio ambiente ta uno compleho como tambe impactante. Tur partido tin un tarea specifico pa haci y sin balans y colaboracion estrecho entre partners cu tin un vision colectivo, e maneho no ta posibel, cual ta e enfoke di e nota aki. Ministerio y DNM ta gradici tur esunnan cu ta duna nan tempo pa cu e maneho aki. Cu hopi confiansa y bon speransa ta inicia un etapa nobo.