NAIROBI, Kenya- E aparicion di un buraco grandi den un carretera di e condado di Narok (Kenya) dia 19 di maart ultimo, ta desconcerta e comunidad cientifico: nan no por yega na acuerdo pa loke ta e origen di e fenomeno aki.
E buraco aki ta varios kilometer largo, mas di 20 meter di hancho y 15 di profunidad. Su aparicion no tabata precidi pa niun actividad sismico y “cu tur probabilidad el a wordo durante un lapso di mas di un miyon di aña”, según Ben Andrews, geologo di e Smithsonian Institute di Merca.
Andrews ta calcula cu e buraco a wordo exponi door di e awasero, pero e ta opina cu mester busca e causa di e formacion di e placanan tectonico, cu ta seccionnan di e korst terrester cu ta desplaza na 2.5 cm cada aña.
Otro cientificonan, manera e geologo Wendy Bohon, ta kere cu e buraco a keda produci den un solo instante: “Mi ta kere cu e ta un buraco di tera, mescos cu por wak na Arizona” como “resultado di awaseronan torencial cu ta kita pidanan grandi di lodo”, asina ta cu “e no ta un resultado tectonico, pero meteorologico”.
Varios estudio geologico ta indica cu cuater pais di e Cuerno di Africa- Somalia, mita di Etiopia, Kenya y Tanzania- lo separa y lo forma un continente nobo cu base di ya conoci ‘placa Somali’ aki 10 pa 50 miyon di aña.
E proceso aki a cuminsa na 2005, ora cu e erupcion di e volcan Dabbahu provoca e aparicion di un buraco di mas di 60 kilometer na Etiopia cu desde e tempo ey, no a stop di crece. Mientras cu un decena di otro buraconan a sigui aparece durante e siguiente cuater añanan.
Desde e tempo ey, e teoria riba e division di Africa a gana bastante popularidad entre e specialistanan riba e materia.
Fuente: http://www.bbc.com/