LIMA, Peru – E expresidente Peruano, Alberto Fujimori, condena pa crimennan di corupcion y contra humanidad, a wordo interna diahuebs den e unidad di cuidonan intensivo di un clinica unda e ta wordo trata pa un dolencia cardiaco, su dokter a informa, ora cu e pais ta motibo di e polemica un posibel indulto humanitario.
“A descarta un infarto den e miocardio, pero si a haya un insuficiencia den e valvula mitral, cu ta un di e causanan di e takicardia (cu e ta padece). Tambe a haya un dilatacion den e auricula drechi. Tin un respuesta positivo den e reaccion di e pashent, pero ainda e no a stabilisa,” dokter Alejandro Aguinaga, dokter di Fujimori a splica.
Segun Aguinaga, Fujimori di 78 aña, lo keda den e unidad di cuidonan intensivo por lo menos 48 ora. Su yiu muhe Keiko Fujimori, lider di e poderoso partido opositor, Fuerza Popular, a yega na e clinica pa compañ’e, e dokter a agrega.
E expresidente a manifesta un molester den e curason diahuebs mainta y a wordo traslada pa e personal penitenciario na un clinica na Lima, for di e prizon unda e ta cera.
Fujimori, cerca desde 2007, a admiti dialuna riba Twitter, cu e ta conciente cu solamente nan lo liber’e den condicionnan grave di salud. E traslado di e exmandatario na clinica y hospitalnan tabata recurente den e ultimo tres añanan debi cu e ta padece di hipertension arterial y un lesion cancerigeno na su lenga, di loke el a wordo opera den cinco ocasion y ta rekeri evaluacion periodico.
Na 2013, e Gobierno di Ollanta Humala a nenga e indulto humanitario na Fujimori, pues un informe medico a establece cu e no ta reuni e condicionnan pa ricibi e beneficio aki.
Fujimori, kende a goberna entre 1990-2000, ta cumpli un condena di 25 aña di prizon pa corupcion y violacion di derechonan humano durante su mandato, den e marco di e lucha contra e guerilla di Sendero Luminoso.
Fuente: http://www.elespectador.com