Awe a sali pa Iceland, e prome grupo di kleuterschool di Aruba cu lo participa den e programa di Erasmus+.
E grupo ta consisti di coleganan di Imelda Kleuterschool, Agnes Kleuterschool, Scol Preparatorio Cacique Aterima y Scol Preparatorio Prome Paso.
Recientemente SKOA a ser acredita pa Erasmus+ cual ta haci posibel cu scolnan restaura bou SKOA por participa na diferente programa di Erasmus+.
Pa por participa scolnan mester entrega un peticion cu ta cuadra cu nan Plan di Desaroyo di scol y un plan con lo implementa e conocemento na scol.
Como Scol Preparatorio ta di suma importancia pa por amplia conocemento riba e area di Necesidad Special y Inclusion di Alumno.
Pesey coleganan di Imelda Kleuterschool, Agnes Kleuterschool, Scol Preparatorio Cacique Aterima y Scol Preparatorio Prome Paso sigur ta hopi entusiasma pa participa na e programa aki pa asina por haya mas habilidad y conocemento pa sigui traha pa saca e mihor di cada alumno.
Hunto cu coleganan di Pius X school y Scol Caiquetio nan lo participa pa un siman, na e curso di Special Needs & Inclusive Education.
E programa lo tuma lugar na Reykjavik, Iceland bou guia di Smart Teachers Play More.
Nos kier desea hopi exito na e grupo cu ta bayendo Iceland y nos ta sigur cu nan lo trece bek hopi conocemento di gran balor pa nos Enseñansa.