Diabierna ultimo e famia di Rotary aki na Aruba a crece cu 21 miembro nobo na momento cu a instala e prome Interact Club of Aruba. E Interact Club aki ta specificamente pa e alumnonan di Schakel College. Rotary Club of Aruba ta orguyoso di ta sponsor di esaki. Interact Club of Aruba ta un service club pa muchanan di 12 pa 18 aña. Interact Club of Aruba a wordo funda dia 3 di October 2016. Esaki a pasa despues di diferente combersacion y presentacion na Schakel College. E directiva di Schakel College a acepta e idea cu brasa nan habri y asina e proceso di instalacion a bay den un forma fructifero y liher.
E anochi ceremonial y importante a tuma lugar na Divi Links na unda cu señora Julia Phelps ex-directora di Rotary International tabata presente pa instala e 21 miembronan aki. Presidente actual di Rotary Club of Aruba, señor Stanley Looman tabatin e honor di instala e prome presidente di Interact Club, Andrea Nuboer. Andrea na su turno a instala su hunta di directiva cu a wordo eligi door di e 21 alumnonan di Schakel College cu tabata interesa pa funda e club aki na nan scol. E hunta di directiva di 2016-2017 ta consisti di: Andrea Nuboer como Presidente, Max Manichand como Vice-President, Secretaria Franzver van Burik, Kyle Budhu Lall como Tesorero, Club Directors Maxime Ingwersen y Sufi Wadhwani y Jesse Damen e Sergeant at Arms.
Door cu e Interact Club of Aruba ta specificamente pa alumnonan di Schakel College a instala tambe e Faculty Advisor cu ta meneer Ruud de Jong cu lo ta e representate di Schakel College na tur e reunionnan di Interact Club. Di parti Rotary Club of Aruba a instala dos Rotarians como Advisors pa Interact Club kende ta Frederick Nuboer y Shelby Maduro cu lo guia e Interactors den e reto hopi importante nan dilanti. Hopi ta wordo spera di e 21 miembronan aki cu ta cla pa start cu nan prome proyecto pa asina aki por sirbi e comunidad di Aruba y esnan den mas necesidad.
Presidente Stanley Looman a hiba palabra na unda e la elogia e miembronan y directiva nobo di Interact. El a sigui pa splica e rol importante cu nan tin den nos comunidad. Tambe a gradici e directiva di Schakel College pa acepta Interact na nan scol. Stanley a curasha e Rotarians presente cu tin cu inverti den nos hobennan paso nan ta e futuro di Aruba y e futuro di Rotary na Aruba. Kareline van der Linden, Presidente di Rotaract Club of Aruba tambe a hiba palabra y a enfatisa e colaboracion cu e ta spera entre e club nan. Interactors ta tambe e futuro miembronan di Rotaract.
Presidente Andrea a duna palabra di gradicimento na Rotary Club of Aruba pa nan sosten pa asina porfin por a instala e prome Interact Club na Aruba. Tambe a gradici directora di su scol Inge La Haye pa su confiansa den Rotary pa asina aki Schakel College por a acepta e idea aki.
Rotary Club of Aruba kier a gradici tur e miembronan di Rotary Club of Aruba, Rotaract Club of Aruba y Schakel College. Tambe kier a duna un danki na e personal di Divi Links Aruba pa un tremendo anochi.
Cu e adicion di e 21 miembro nobo nan aki Presidente Stanley Looman ta sigur cu hunto nos di e famia di Rotary aki na Aruba lo sigui hasi hopi mas pa e comunidad di Aruba y asina aki cada un di nos lo sa di duna su aporte necesario pa e bienestar di nos comunidad.
E 21 miembro nan di Interact Club of Aruba ta: Andrea Nuboer (President), Carlina Valkenburg, Caroline Janse, Darrin Wever, Ellys Pineda-Solis, Francesca Koeman, Gilbertus Henriquez, Franzver van Burik (Secretary), Giulia Brezovar, Herman Nahar, Isabelle de Cuba, Jesse Damen (Sergeant at Arms), Jim Weerdt, Joshua Sou, Kyle Budhu Lall (Treasurer), Laurensz Moeharram, Max Manichand (Vice-President), Maxime Ingwersen (Director), Rhea Wadhwani, Sufi Wadhwani (Director) and Trinity Meza-Orellana.