“Loke cu Gobierno kier ta pa nos muchanan ta mas envolvi cu gobernacion y scucha mas di nos muchanan y pa nos muchanan tambe scucha mas di Gobierno”
Ministerio di Asuntonan General a cuminsa cu e Proyecto ‘Periodista pa un Dia’ 2023. Esaki ta un proyecto importante pa stimula nos muchanan pa un posibel profesion den periodismo. Cada diabierna pa e luna di juni, lo scoge muchanan cu registra y invita nan bira ‘Periodista pa un Dia’ y haya e oportunidad pa haci nan preguntanan na Prome Minister di nos pais.
Prome Minsiter Evelyn Wever-Croes diabierna atardi a ricibi 5 mucha di scol basico pa asina duna nan e oportunidad pa ta Periodista pa un Dia den sala di prensa di Gobierno di Aruba. 3’or di atardi, e hobennan Jeneady, Rovanne, Eslan, Sarah y Raimy a yega Bestuurskantoor cu yen di entusiasmo pa conoce y haci nan pregunta na Prome Minister.
Den e sala di Conferencia di Prensa di Gobierno di Aruba, señor Andrew Vrolijk, di TeleaAruba a splica e muchanan kico ta periodismo. Andrew ta un hoben di 34 aña kende cu apenas 16 aña y ainda bayendo scol ya a cuminsa traha den e mundo di periodismo, encurasha pa su tata, e conocido Leo Vrolijk. El a cuminsa traduci noticia di deporte di otro idioma pa Papiamento. Awe Andrew ta e presentador di noticia completo. Un trabou segun Andrew, cu mester hopi disciplina, amor y dedicacion. E conseho cu Andrew a duna e muchanan ta: Kere den nan mes den tur loke nan ta haci. Andrew a kere den su mes semper for di hoben y a cumpli su soño. Ora bo kere den algo, no worry cu opinion di ningun hende cu kier desvia bo di bo soño pero kere den bo mes.
Sandra Croes, presentadora den Conferencia di Prensa di Gobierno di Aruba a conta un tiki di su trabou den Conferencia di Prensa y a encurasha e muchanan pa semper sigui nan soño si esaki ta den e ramo di periodismo y semper trece e berdad padilanti pa asina contribui na un Aruba bon informa pa haci nos mas fuerte.
Prome cu a pasa pa e sala di conferencia, e muchanan a bishita Prome Minister den sala di Conseho di Minister na unda nan a wordo splica di e desicionnan importante pa Aruba cu ta sali for di e reunionnan di Conseho di Minister.
Pa clausura e prome dia di ‘Periodista pa un Dia’ a tuma luga e Conferencia Live. Esaki a wordo pasa na TeleAruba y riba pagina di Facebook di Gabinete Wever Croes 2. E muchanan a haya oportunidad pa haci nan preguntanan na Prome Minister. Un total di 15 pregunta cu tawata varia den bida personal, estudio, trabou y hobby di Prome Minister. Prome Minister a haya cada pregunta hopi interesante y a contesta tur. Cada mucha a sinti contento y satisfecho cu nan pregunta a wordo contesta.
Na final, Prome Minister a laga un mensahe hopi bunita atras pa nos muchanan: “Ta algo bunita y importante pa nos muchanan conoce con Gobierno ta funciona, con e sala unda tur siman tin conferencia di prensa ta funciona. Un di nos muchanan un dia lo haya interes pa bira minister of periodista. Loke cu Gobierno kier ta pa nos muchanan ta mas envolvi cu gobernacion y scucha mas di nos muchanan y pa nos muchanan tambe scucha mas di Gobierno. Pasobra na final di dia, e desicionnan cu nos tuma awe ta na nan bienestar y ta nos muchanan mester bay carga den futuro”.
Prome Minister ta gradici tur esnan cu a haci ‘Periodista pa un Dia’ posibel y un exito. Danki tambe na señor Andrew Vrolijk pa su tempo pa splica nos muchanan mas di e trabou aki. Danki na e mayornan pa permiti nan yiunan participa y danki special na nos muchanan cu a participa.
Ainda tin oportunidad pa esnan cu ta interesa pa aplica pa participa na e proyecto ‘Periodista pa un Dia’. Cu ayudo di mayor of representante, por bay na e link: https://forms.office.com/r/kXrNkVcebg of scan e QR code riba pagina di Facebook Gabinete Wever-Croes pa yena nan informacion y preguntanan cu nan ta haya interesante pa puntra Prome Minister. E alumnonan cu a wordo selecta lo ricibi un e-mail di confirmacion.
