Pa un pashent bay afo di Aruba pa haya tratamento no ta bay asina facil si no esaki tin un proceso pa cual aki Sra. Solange Tchong di azv ta splica con esaki ta traha.
Pa un pashent bay afo, e specialista mester haci e peticion na AZV pa e pashent haya tratamento medico den exterior. Pa e peticion ey tin e Comissie Grensoverschrijdende Zorg, dus un comision cu ta evalua e peticionnan pa e persona bay afo. E comision aki ta consisti di profesionalnan medico, dus dokternan, combina cu consehero medico di AZV, cu hunto ta sinta evalua e peticionnan aki.
Nan ta evalua si en berdad tur tratamento of examennan cu por haci na Aruba a tuma luga y kico ta wordo pidi. Si di berdad tin un intencion medico real su tras pa bisa cu ta bay manda pashetn. E comision na su turno ta duna AZV un conseho, y AZV generalmente ta tuma e conseho aki over. Esey kiermen cu ora e comision bisa cu e pashent mester bay afo, nan ta tuma e conseho over y ta bay laga e pashent bay den exterior riba gastonan di AZV.
E proceso ta uno hopi defini, dus e comision di un banda ta duna conseho na unda cu ora nan duna e conseho, ta evalua tur circunstancia rond di e pashent tambe. Dus un banda ta wak e parti di ley, di otro banda ta wak e condicion fisico di e pashent, si e pashent por bay cu air ambulance of cu vuelo comercial normal.
TUr e partinan aki, ta wordo considera den e evaluacion. Banda di esey, AZV tambe tin e posibilidad unda cu ora un pashent mes ta p.e., den un situacion di diferencia di opinion cu su specialista, of un conflicto cu ta hopi serio. E momento ey, e pashent mes tambe por haci un peticion directo na AZV. Den e parti aki, no tin diferencia. E proceso ta keda igual. E pashent ta haci e peticion, pero toch AZV ta zorg pa e peticion aki pasa den e mesun comision, pa motibo cu nan ta hendenan cu tin e capacidad y conocemento pa por evalua e peticion debidamente.
Tambe lo tuma na consideracion loke e pashent ta trece dilanti. E prome posibilidad semper ta manda e peticion y ta haya e contesta pasobra e ta haci esaki nan nomber di e pashent. E otro posibilidad ta ora cu ta papia di diferencia di opinion grandi. Ora tin conflicto, e ora ey pashent mes por acerca AZV, manera a sosode cu Baby Lunah.
Sra. Tchong a splica cu tin un pensamento eroneo di nos hendenan, ora nan ta pensa cu nan tin derecho riba cuido medico. Pero mester puntra kico ta e derecho stipula den ley. Esaki ta stipula cu tin derecho riba cuido medico, pero mara na cierto rekisitonan. Pa por evalua esaki na un forma responsabel y debido, AZV tin e comision di expertonan cu ta evalua e peticionnan un pa un. E ta un proceso continuo, tur diaranson e comision ta reuni pa trata e peticionnan cu ta drenta. Pero pa casonan di emergencia, tin liñanan cu ta on call, dus liñanan continuo. Ta haya casonan hopi grave, cu no por wordo trata na Aruba, e persona e ora ey por wordo manda cu air ambulance.
For di 2001, AZV aña aden, aña afo, semper ta cumpli cun’e, y nan ta kere cu nan ta haci esaki na un forma debido, hustamente pa tur hende realisa cu hustamente e casonan cu ta bin eyfo, unda ta wak un persona kisas ta haciendo un radiothon, of ta buscando un otro ayudo, etc, hopi biaha ta casonan excepcional. Ta casonan cu mester bay wak pa con pa yega na un solucion. Atrobe e ley di AZV ta limitabo, na kico por y kico no por como instancia.