Minister Alex Schwengle e proyecto aki di crea pamfletanan di salud, ta un di e metanan cu gobierno y salud publico tabata tin pa cuminsa tin materialnan pa informa e pueblo atraves di e plataforma di salud.
E plataforma di salud ta pa crea unidad. Unidad den vision, unidad den pensamento, unidad den trahamento. Ta pesey a bin cu e plataforma di promocion di salud ta un plataforma cu e idea cu nos ta sinta hunto y pa papia di diferente tema. Y tambe pa sali, vooral ora di duna informacion, pa e informacion ta bon y pa no tin confusion.
Si tin diferente sorto di folder y si e informacion no ta cuadra cu otro, e ora e pashent no sa ken pa kere. Esey tabata e idea tras di e plataforma. Minister Schwengle a gracidi Aruba Lions Club, cu a yuda den crea e plataforma aki.
Aruba no tin un leescultuur pero esey mester wordo stimula na scolnan. Apart di esey, e website di departamento di salud mester wordo ehecuta ainda. E ta na top di e wishlist y na momento cu esey ta un realidad, tur informacion lo bay riba e website na un forma digital. Ora cu tin un campaña specifico lo por usa rednan social pa boost e informacion pa asina e informacion yega na e poblacion y vooral e poblacion jong.
Mester tene cuenta cu e malesa di sucu no ta pa hende riba 60 aña, pero tambe pa hendenan jong. Dus ta bon pa nan sa, y pa nan tin e informacion necesario pa cuidanan mes lo mas miho posibel.
Tur cos ta cuminsa cu’n bon educacion. Ta pesey e foyeto aki tey, pero e proyecto di scol saludabel. Segun e minister, no tin un miho programa preventivo pa Aruba, cu un scol saludabel. El a cuminsa como pilot na 2012, pero esey a cambia. Awo e stuurgroep ta wordo pusha for di Directie Volksgezondheid, conhuntamente cu e otro partnernan, e.o. Onderwijs.
Minister Schwengle ta kere cu ora cu e scol saludabel ta funciona na tur scol, na termino largo lo duna su frutonan. E no ta bay duna su fruto di biaha, pero e lo duna su fruto aki 10 pa 15 aña. Pueblo hopi biaha kier quick wins. Pero lastimamente cu mayoria di nos problemanan den salubridad ta problemanan cronico y structural cual ta rekeri di tempo. Solucionnan adhoc, quick fix cu bo ta purba bin cun’e, e por alivia e dolor den cuater aña, tur e inversion den cuater aña ta bay perdi, segun dr. Alex Schwengle, minister di Salubridad Publico.