Despues di un estudio cu a tuma mas cu 10 luna, e Plan pa Desaroyo di nos producto turistico – ‘Cu Mira Pa Futuro’ a wordo lansa y A.T.A. di su parti ta trahando activamente riba dje.
A.T.A. como e autoridad di turismo ta traha pa fortifica Aruba su pilar economico principal pa asina Aruba por sigui florece como un destinacion di turismo sostenibel pa e añanan y generacionnan cu ta na caminda.
‘Cu Mira Pa Futuro’ ta resultado di un proceso di investigacion y dialogo extenso unda mas cu 350 participante di varios background y nos poblacion local a bini hunto, durante e fase di desaroyo, treciendo dilanti ideanan innovativo y sostenibel pa beneficia tanto e comunidad como e bishitante.
E importancia di e plan aki.
E plan di desaroyo di ‘Cu Mira Pa Futuro’ ta di suma importancia pa loke ta trata pasonan cu mester tuma pa traha riba un desaroyo turistico sostenibel. No ta facil pa ahusta for di e mas cu 30 aña di exito den establece Aruba como un destinacion popular pa turista. Un pregunta cu por surgi ta: “Pakico cambia un formula ganado?” Segun cu nos isla ta mira e futuro y ta wak e cambionan global y tambe e deseonan di generacionnan nobo di bishitante, ta birando mas y mas importante pa mantene Aruba su posicion primario como destinacion di turismo y sigura cu Aruba ta keda estableci como un destino atractivo den e mundo aki, specificamente den e region di Caribe.
A.T.A. a acerca e comunidad local y a trece hopi partido hunto. Ta reconoce e mentalidad pionero di tur esunnan di un of otro manera, cu directamente of indirectamente a contribui na e fundeshi pa e exito cu nos industria turistico a logra haciendo cu nos destinacion ta exitoso awendia.
A.T.A. ta desea di sigui stimula conscientisacion di e plan aki bao di nos comunidad y como tal ta invita y anima un y tur pa bishita e website www.cumirapafuturo.com pa asina siña mas tocante e proyecto aki y pa mira kico nos tur por haci pa hunto nos hiba Aruba su turismo y comunidad na e siguiente nivel.