Manera tur aña ta e tradicion, atrobe por mira cu na Dr. Horacio E. Oduber Hospital tabatin yen movecion di e muchanan di Hospi Bondi cu a trece canto di alegria y tambe dande pa un y tur presente. E coro infantil di Hospi Bondi compaña pa nan lider y grupo di musico a pasa bishita diferente piso di cuido y departamentonan na Hospital, treciendo e ambiente di fin di aña cerca cada un empleado y pashent. Aunke e pashentnan por ta den Hospital ta purba pone un sonriso riba nan cara, treciendo aguinaldo y bon desenano di Pasco.
Lider di Hospi Bondi Camp di Hospital, sra. Noralfa Eckmeyer, kende ya pa di tres aña ta participando den e organisacion di Paranda di fin di aña, a splica cu tur cos a bay hopi bon. Meta di e paranda ta pa recauda comestibel cerca e diferente departamento pa duna famianan den necesidad na Aruba. Tambe ora nan ricibi placa lo cumpra comestibel pa pone acerca. E macutunan yen comestibel lo duna na parokia y parokia ta sigui distribui nan pa hendenan di menos recurso.
Sra. Eckmeyer a sigui bisa cu e muchanan a haci e recorido y a wordo ricibi cu man habri y hasta a conmovi y trece emocion bunita cerca pashentnan. Tabata reina un ambiente di hopi animo y tur hende tabata contento cu e biaha aki a logra haci’e un biaha mas.
“Pa nos di Hospi Bondi ta un placer pa trece e ambiente di Pasco y aña nobo. Nos ta cer’e cu un Dande pa e pashentnan cu no ta make it pa pasa un Pasco cerca nan famia”, e coordinado di Hospi Bondi a duna di conoce.
Grandi y chikito a gosa di e tremendo paranda. Tanto e lidernan como e muchanan di e paranda di fin di aña, Hunta di Directiva, staf y personal di Dr. Horacio E. Oduber Hospitaal ta desea un y tur Feliz dianan di fiesta y un 2017 yen di salud.