E pan di Werksters di scolnan ta na peliger: Mas cu 90 persona por keda sin trabao

Awe tabata tin un encuentro informativo pero na mes momento un encuentro caminda cu werksters di SKOA a tuma decision riba kico ta bay sosode. SEPPA a reuni cu werksters pa informa riba e situacion cu ta asina cu for di siman pasa caba tin un manifestacion di protesta tumando luga bao werksters di SKOA riba locual minister di enseñansa ta purba di haci cu e fundacion SKOA y por lo tanto cu enseñansa riba su mes.

Henter historia di tur locual ta pasando ta cu desde december 2019 e minister di enseñansa a dirigi un carta na SKOA na unda ta informa cu tin cierto decisionnan – aunke ta gobierno a tuma nan na 2015 – cu esakinan lo ta robes, y cu SKOA riba su mes ehecutando esaki lo a haya placa di subsidio di mas, of en todo caso a paga trahadornan cu ta haci limpiesa di scol na un manera incorecto segu Magaly Brito di sindicato SEPPA.

E tempo ey tabata tin un caso na corte y SKOA a haya un decision negativo, esey ta wordo interpreta door di minister ‘pa e haci y deshaci’ segun SEPPA. Magaly: “E situacion ta di tal manera cu aworakinan e minister na december 2020 como regalo di pasco ta bolbe dirigi un carta unda ta tuma cierto decisionnan y cobra SKOA un suma grandisimo di placa, nos ta papiando di miyones, un placa cu SKOA a paga e werksters aki y ora nos papia di paga esaki ta kisas un bashi premi of un vacantieuitkering, y otro beneficio secundario cu cualkier trahado lo disfruta y tin beneficio riba dje.”

Bo por interpreta – cu locual minister ta cobrando, defacto ta nifica cu ta nenga e trahadornan aki humilde cu no tin salario halto tampoco, sikera un cachi cachi extra. E placa aki aworakinan ta bay asina leu cu ta cobrando SKOA, y SKOA riba su mes e debe a keda crece y nan ta hay’e te den skina cu kier tuma decisionnan kisas pa kita algun trahador di trabao. “Locual cu nos a bin ta reclama caba, e minister di su banda ta bisa cu no ta e ta kita, claro no ta e ta kita pero bo ta forsa SKOA bay e direccion aki. Y nos ta compronde claramente cu e intencion su tras ta pa SKOA busca un servicio mas barata, y manera nan ta bisa di e forma aki laga un grupo grandi di mas cu 90 trahado riba caya,” segun sra. Brito.

Comments

comments