CANBERRA- E cardinal Australiano George Pell, responsabel e finanzas di Vaticano, ta e dignatario mas halto di Iglesia Catolico haya culpabel di pedofilia despues di un huicio na Australia, EFE a reseña.
Un tribunal Australiano diamars a publica un veredicto di culpabilidad pa cinco cargonan di abuso sexual contra di menornan, incluyendo penetracion, cometi entre 1996 y 1997 na Melbourne tempo Pell tabata arsobispo di e ciudad aki den e parti sureste di Australia.
Un jurado a tuma e decision unanimamente dia 11 di december 2018, pero esaki pa motibonan legal no por a wordo divulga oficialmente.
Pell, cu ta den libertad condicional ta en espera di su sentencia, por haya te 10 aña di prizon, aunke su abogadonan ya caba a apela e veredicto.
E cardinal, di 77 aña, te cu aña pasa tabata un di e conseheronan mas cercano di papa Fransisco, cu a compromete su mes na responde cu cero tolerancia na abusonan sexual di menornan.
Pell a nace na Ballarat (estado di Victoria) dia 8 di juni 1941 yiu di e matrimonio entre George Arthur, un ex campeon di boxeo de fe Anglicano, y Margaret Lillian, un catolico devoto. E tin dos ruman, Margaret y David.
E cardinal a studia den e centro catolico Loreto Convent y St Patrick na Ballarat, unda el a destaca como deportista y a hasta hunga un tempo cu e Richmond Football Club den e Liga di Futbol Australiano.
Sin embargo, na 1969 Pell a dicidi na ingresa den e seminario Corpus Christi, na Victoria, y a wordo ordena como pastoor den e basilica di San Pedro na Roma, prome cu el a gradua cu’n doctorado den Historia di Iglesia Catolico den e Universidad di Oxford na 1971.
Den e decada di 1970 y 1980 el a traha como pastoor y docente den varios parokia y centronan Catolico Australiano, incluyendo den su ciudad natal Ballarat.
E Australiano a wordo nombra Obispo Auxiliar di Melbourne na 1987, Arsobispo di e mesun ciudad aki na 1996 y Arzobispo di Sidney na 2001.
Dos aña despeus, el a wordo nombra cardinal door di papa Juan Pablo II, cu a permiti’e vota den e conclavenan pa eligi e pontifice y pa cual, e tabata un di esunnan cu a vota den e eleccion den cual e actual Papa Fransisco a wordo eligi na 2013.
E aña siguiente Pell a wordo eligi prefecto di e Secretaria di Economia di Santa Sede, un puesto nobo crea pa e pontifice pa aborda e scandalnan en cuanto e finanza di Vaticano.
Sin embargo, esun considera number 3 di e nunciatura Romano, despues di e papa y e secretario di estado, e sospecha di casonan di pedofilia den seno di Iglesia Catolica na Australia, semper a persigui Pell, y varios di nan cometi na Ballarat.
Na 2002, tempo cu e tabata arsobispo di Sydney, un homber a sigura di a abusa sexualmente door di Pell na 1961, tempo cu e tabata tin 12 aña y Pell, tabata studiando pa bira pastoor.
Na maart 2016, Pell a reconoce cu den e decadanan di 1980 ta existi “un mundo di crimen y tapamento” den Iglesia Catolico pa proteha e institucion, el a nenga rotundamente di a abusa sexualmente di un menor.
Esaki el a declara como testigo den e comision special cu a investiga pedofilia den institucionnan Australiano y cu a conclui den un informe cu 7% di tur e pastoornan na Australia a abusa di menornan bou nan encargo entre 1960 y 2015.
E mesun comision a revela cu den añanan 1970 an Ballarat tabata tin un red di pastoornan pedofiel.
Dia 29 di juni 2017, polis Australiano a entrega denuncia di pedofilia contra e cardinal cu e mesun dia a pidi ‘un permiso special’ na Vaticano pa demostra su ‘inocencia’.
P’aworaki el a wordo haya culpabel den un prome huicio, mientras cu un di dos, pa supuesto abusonan cometi den e decada di 1970 na Ballarat, no a sigui pa falta di prueba.
Pell ta un conservador cu den pasado a mustra su oposicion na ordenacion di e hende muhe, divorcio y abortus, y cu den al menos un ocasion a nenga di duna comunion na homosexualnan durante un sacrificio di misa.
E cardinal tabata e prome dirigente Catolico den toca e tema di abusonan sexual na menornan den seno di Iglesia Australiano, y na 1996 ta crea un programa di compensacion economico, aunke el a haya criticanan pa no a duna suficiente apoyo na e victimanan.
Papa Fransisco ainda no a duna niun comentario, mientras cu Pell ta sigui den e cargo di “Minister di Economia” segun e pagina web di Vaticano.