E logo “Berd’e ta” di e partido AVP ta bisa hopi di e partido, su intencionnan y su manera di pensa y su manera di goberna. E ta representa tur loke ami como rubiano hoben studia no ta para pe y no ta kere aden. Esaki ta segun candidato riba lista di POR, Joselin Croes.
Den Parlamento “Berd’e ta!” ta representa un stempel parlement cu hamas lo bay en contra di un proyecto of maneho of presupuesto di su Gobierno cu ta Berde Berde, paso nan lealtad ta na e bandera berde di AVP y no na e bandera blauw, strepi geel strea cora di nos isla y su hendenan. Un cantidad di parlamentario sin voz propio. Si berdad nos tabata tin un Parlamento cu no tabata mara na e color politico di nan partido mi ta kere cu hamas awe nos lo a yega na un debe nacional di 4 biyon florin. Cualkier persona independiente y imparcial lo a obliga Gobierno tin un balanced budget y pa no presta mas cu nos por paga bek. Pero pasobra ta berde nan ta, nan mester cumpli cu ordo di partido y lubida cu ta pueblo a pone nan eynan pa ta nan voz y nan oido. Ta parce cu dia 22 di September tin eleccion pa ken ta bay goberna, pero e realidad no ta asina. Pueblo ta votando pa su 21 miembronan di Parlamento. Si cu Dios su poder y confiansa di nos pueblo mi logra drenta Parlamento un dia, mi lealtad lo ta na mi pueblo y sigur no na mi partido. Mi voz y mi desicion lo ta uno propio, basa riba lo miho pa mi isla y mi hendenan. Bandera durante campaña ta leuk y tur pero e unico bandera cu ta conta ta e bandera di Aruba. Si tur Parlamentario actua y pensa mesun cos nos lo por logra un Parlamento di nivel halto cu berdaderamente ta controla Gobierno y cu esey bo ta logra proteha bo Trias Politica.
Den Gobierno “berd’e ta” kiermeen cu bo mester ta berde pa bo haya tereno, trabou, proyecto pasobra si bo no ta berde no tin nada pabo. Como Arubiano profesional cu a studia duro pa logra yega unda mi ta awe e ta frustrante y e ta dunabo un sabor amargo pa wak personanan sin ningun educacion bira coordinador, haya puestonan halto, haya tereno na cantidad djis pasobra “Berd’e ta!” Si bo no ta berde bo no ta conta. Hopi ta e hobennan cu mi ta papia cu nan cu ta bisami con inhusto e ta cu nan ta miho cualifica y tin mas experienca cu hopi otronan cu ta haya trabou, pero paso nan famia ta di un otro color politico nan ta wordo nenga trabou. Anto despues bo kier puntra bo mes pakico nos yiunan di tera no ta bolbe Aruba. Un otro problema grandi ta cu cada 4 of 8 aña cu cambio di Gobierno ta bin un persecucion politico formal. Ami a pasa aden, dus mi sa di kico mi ta papia. Gobierno ta cambia, nan ta pone tur nan hendenan den posicionnan clave y manda tu hende di otro color cas cual ta crea un overtolligheidspool grandisimo y ineficiencia den varios departamento pasobra bo ta kita bon hende cu experiencia for di trabou djis pasobra nan no ta berde of geel. Nos a bin ta vocifera cu mester para e cantidad di coordinadornan, cuminsa usa bo expertonan cu bo tin inhouse. Mester stop e discriminacion di nos mesun hendenan pavia di nan color politico, mester para persecucion politico, mester duna balor na cada persona paso nos tur ta Arubiano. E cuenta cu Berde bo mester ta pa conta mester caba.
E slogan “Berd’e ta” ta disciminatorio, exclusivo y ta crea desunion y desigualdad den nos mesun hendenan. Nos no a nace berde, geel, blauw, biña, bruin. Nos tur ta biba riba Aruba y nos tur tin mesun derecho y nos tur mester tin e bienestar di nos pais na prome luga y nunca e bienestar di nos color politico prome.