Benjamin Romero periodista na Aruba ta splica dicon e buki aki y dicon e tema aki. Esaki tin di haber cu tempo su tata a bin biba na Aruba.
E dia aki tabata uno special pa Romero, pasobra oficialmente el a anuncia su prome buki “E negoshi di koffie na Aruba”. E ta un buki cu ta refleha loke tabata e negoshi di koffie durante tres decada aki na Aruba. E ta su prome buki. E ta un fase nobo cu e ta dunando den su bida profesional di casi 30 aña como periodista y naturalmente ta un reto. E tabata un reto pa bin cun’e. E ta un buki skirbi na un estilo di reportahe profundo. Reporterismo puro. E hendenan cu a forma parti di e historia magico aki, un historia magico pasobra ta increibel cu un isla ancla den Caribe riba e mesun nivel di lama, a aparece entre e top dies di e paisnan mas importante di exportador di koffie na mundo. Un producto cu ta wordo cultiva na un nivel di 1200 pa 1800 meter riba nivel di lama. Increibel cu Aruba ta aparece entre e paisnan mas importante di exportador di koffie durante tres decada. Esey tabata e magia cu solamente hendenan cu curashi, cu vision, cu perseverancia a logra cu e tabata un grupo di comerciante local. E ta un buki di 10 capitulo, 112 pagina. E tin un bunita presentacion cu ta hopi diferente. Un tiki mas largo, un cover duro y tin diferente potret cu tambe no solamente preto cu blanco, pero potret na color. E ta parti di e presentacion di e buki pa asina hende por tin refleho di locual ta e contenido di con e negoshi aki tabata. Koffie na Aruba a nifica hopi mes. E tabata un sector economico social cu a bin tempo cu ainda nos turismo tabata na inicio. E no tabata tin e desaroyo cu e tabata tin awendia. Refineria naturalmente tabata un pilar economico. Koffie a bin ta diversifica nos economia. E buki aki a nace naturalmente, pasobra Romero a lanta den ambiente di comercio. Su tata tabata comerciante cu a bin establece na Aruba tempo di su hubentud. El a traha hopi aña na Aruba. El a traha cu un negoshi, Tienda el Gallo. Hopi hende ta corda e tienda aki den Wilhelminastraat. Su tata tabata esun cu tabata maneha e negoshi. E ora for di mucha e ta scucha e storianan di koffie y tin biaha ta mira cu e partinan di historia ta wordo mescla cu e partinan di leyenda y mito. Ora cu a bin establece na Aruba bek 25 aña pasa, un colega a bis’e cu Aruba a aparece den e top 10 di e paisnan mas importante exportador di koffie. Sin tin un mata of produci un pipita di koffie. Romero a hay’e sumamente interesante. E ora a dicidi di cuminsa skirbi e storia aki. Na 2014 a cuminsa cu e proceso di compila informacion. A papia cu e dos comerciantenan mas importante di e tempo aya, cual ta sr. David Cybull y sr. Nel Harms en feliz memoria. Tambe a papia cu e protagonistanan di e tipo di negoshinan aki, for di nan propio perspectiva. Tabata tin capitan di barco, comerciantenan di Colombia cu tabata trece koffie.
Segun Romero koffie na Aruba tabata algo asina grandi sin a planta un dia e mata, pero aki tabata sali hopi koffie for di waf.
El a sigui splica cu waf tabata nos cunucu di koffie na Aruba. Con e desaroyo a tuma luga den nos waf tambe, con tanto hende di diferente districto di Aruba a beneficia tambe di e negoshi di koffie. No solamente hende grandi, sino hendenan humilde. Esey ta e esencia di e buki aki. Rescata e historia ey, historia cu por ta hopi di nos no ta conoce of hopi di nos a scucha parti di dje. Den e buki aki ta conta manera e ta. E ta un estilo periodistico, cu un veracidad e ta skirbi. E no ta un realismo magico tampoco. E no ta literatura, pero e ta periodismo.
Dia 7 di December proximo, pa 6’or di atardi na Biblioteca Nacional den George Madurostraat, lo bay tin presentacion di e buki.