Den cuadro di siman di ‘Festival di Buki pa Mucha’, riba dia 1 di November Museum of Industry a organisa un ‘Atardi di contamento di cuenta’ pa mucha pa asina enfoca riba e importancia di lesamento. Cu e cooperacion di Santa Theresita Center, e museo a logra cera un grupo di 15 mucha cu edad entre 4 pa 10 aña cu tabata hopi interesa pa un atardi di cuenta.
Pa por a haci esaki un experiencia inolvidabel pa e muchanan, e museo a invita dos autor. E evento a wordo inicia door di Tio Ali cu ta un escritor di Corsou y cu sa bishita Aruba pa hopi aña caba durante siman di ‘Festival di Buki pa Mucha’. Tio Ali ta un motivador y presentador cultural cu tambe ta conoci pa ta hopi activo den eventonan cu mucha. Tio Ali a entretene e muchanan cu su tambu y e muchanan tambe tabata tin oportunidad pa baila riba e ritmo di e tambu.
E di dos autor cu museo a invita ta Edselyn Figaroa cu ta un autor di tera mes. Edselyn ta masha conoci mes den nos comunidad pa traha cu muchanan atrabes di canto y tambe ta escritora di e buki ‘365 storia pa mucha’. Contando storia di oma, opa y e frutanan di nan cunucu, e muchanan a diverti nan mes y, mas ainda, ora Edselyn a cuminsa toca guitara.
Na final di e evento, e muchanan a haña un dushi pakete pa hiba cas. Museum of Industry ta gradici Oduber Agencies Aruba, Springfield Supermarket, Home Fun Super, Santa Theresita Center, Perfect Team Event Planners y YMCA Aruba pa nan sosten y ayudo pa por a haci e atardi aki posibel pa nos muchanan. Esaki ta e prome y sigur no e ultimo evento di contamento di cuenta pa nos muchanan!
Pa esnan cu ta interesa pa pasa bishita, e Museum of Industry ta situa den e emblematico Water Toren na San Nicolas y ta forma parti di un constelacion di cinco museo cu ta cay bou di Fundacion Museo Arubano. E museo ta relata e storia asombroso di e desaroyo industrial na Aruba den e ultimo dos siglonan, cu ta encera e industrianan di oro, aloe, fosfaat, petroleo y turismo. Ademas, den e seccion berde, e museo tambe lo exhibi e “Museum Incubator Project”, den cual proyectonan inovativo tocante desaroyo sostenibel na Aruba lo wordo exponi diseña door di e hubentud di e isla.
E Museum of Industry ta habri di dialuna pa diabierna di 9.00am te cu 6.00pm y riba diasabra di 10.00am pa 2.00pm.
Si bo persona ta interesa pa bin cu un grupo of organisa un evento na Museum of Industry, por tuma contacto cu e museo na 584 7090 y tambe por sigui nan via Facebook.