Sindicato STA a reuni cu gerencia di Triple A NV, diaranson siman pasa. E punto di pensioen a bin dilanti un rato so. Locual cu STA a entrega na Triple A NV, ta un presentacion cu nan tabata tin di APFA.
Gerencia di Triple A NV no tabata na altura di e presentacion. Ora cu STA ta vocifera cu APFA ta miho pa empleadonan di Triple A NV, ta pasobra cu nan tin documentonan pa apoya esaki. STA no ta papia pa papia, nan tin hendenan cualifica, bon studia cu a traha un presentacion pa APFA y cu a bin duna e presentacion aki tambe, segun Sr. Diego de Cuba, lider di sindicato STA.
Minister encarga cu Triple A NV, Dangui Oduber, tambe a haya un copia di e documentonan aki. Y Dios mediante, diaranson 13 di februari, STA lo reuni conhuntamente cu minister Dangui Oduber y e minister cu lo mester representa minister Glenbert Croes den e reunion aki, cual probablemente lo por ta Sr. drs. Rudy Lampe. Tambe lo bay t’ey, e directiva completo di STA, e Raad van Commissarisen di Triple A NV, mediador di gobierno. Y ta pensando pa trece cu actuaris independiente cu por aclarea cierto preguntanan cu lo por bin dilanti den e reunion aki.
Loke STA ta lamenta si, ta locual cua sosode unda cu kier bulldoze algo sin consulta cu e empleadonan. Y despues di esaki, nan kier obliga e trahadonan den un breakfast obligatorio pa nan saca afo, kico ta nan deseonan. Sr. de Cuba ta haya cu ta miho pa bin cu’n votacion pa asina saca afo kico e hendenan kier exactamente.
A facilita directiva di Triple A un copia di e presentacion aki. Y a informa cerca APFA pa verifica si e presentacion (cu ta data di 2016) ta valido ainda, cual tabata afirmativo. APFA a informa STA cu e presentacion a wordo actualisa y cu e den e añanan cu a transcuri toch por mira cu e fondo di pension di APFA ta bin recuperando. Pero e cosnan aki ta bin cu su retonan tambe. Ta depende di locual, si tin mercado pa inverti y si tin mercado pa genera placa, na locual ta interes.
Locual cu STA a haya straño di Triple A NV, pa loke ta e proyecto 2030, APFA ta e instituto cu a hinca mas placa den e proyecto aki. Y ta haya masha straño cu dicon Triple A NV ta neglishando su empleadonan pa bay resorta bou di e fondo di pension di APFA. Pero pa diaranson proximo lo pone un punto final na e cos aki. Ta spera pa logra convence e ministernan, gerencia y Raad van Commissarissen cu locual ta e deseo di e trahadonan, cu ta e decision mas prudente cu gerencia di Triple A y Raad van Commissarissen por tuma, pa laga e trahadonan bay resorta bou di e fondo di pensioen di APFA. Den concepto di STA y si mira e presentacion, esaki ta e miho pa e trahadonan, mirando e salario anual cu nan tin, e ta mas cu cla, cu si nan bay resorta bou APFA nan ta bay gosa di un pension mas conviniente.
E ‘Define Contribution’ no ta bay cumbini e trahadonan. E diferencia entre e ‘Define Contribution’ cu’n ‘Define Benefit’, e ultimo aki bo sa caba cu ora bo yega cierto edad, bo sa caba kico bo ta bay haya ora cu yega 65 aña, contrario na e ‘Define Contribution’. Esaki ta locual cu STA lo bay vocifera na minsiter tambe. STA kier sa ta kico a conduci e comitee cu Triple A a forma, pa a tuma un decision asina aki. Y locual ta mas pio, ta cu den e comite tin hendenan cu ta den APFA pero toch a bay contra di APFA.
Sr. de Cuba a sigui bisa cu den e comite tin hendenan cu e salarionan cu nan ta gana, nan por bay den cualkier pension cu nan kier. Pasobra cu den cualkier pension cu nan bay, nan por bay cumpra un pension di dos pa tres mil florin pa luna. Pero pa e trahadonan mas humilde, cu menos entrada, no a tene cuenta cu nan.
Triple A NV, mayoria di hende toch tin un salario relativamente bon, conhuntamente cu Gerencia di Triple A NV. Ta spera cu via dialogo, por sali di e impasse aki. STA definitivamente no kier mira un accion na airport, mirando cu turismo ta nos unico pilar di entrada actualmente y mester cuida esaki.
Ta pa es motibo aki STA ta bringando hopi pa evita cu e impasse aki desemboca den accion. Y STA ta gradici miembronan y tambe e no – miembronan cu ta sostene STA den e lucha aki, ya cu tin hendenan cu CAO-er y IAO-er cu ta nabegando den e barco aki. AUnke cu tin IAO-er cu ta prohibi pa bira miembro di STA. Pero ta spera cu por cambia e ley aki.
Ta spera cu e reunion di dia 13 di februari proximo duna un resultado positivo pa locual cu ta e decision cu lo mester bay wordo tuma y lo mester biba cun’e.
Un sugerencia cu STA a haci na gerencia di Triple A NV, mirando cu ya tin dos stroming den Triple A, cual ta esun di Guardian Group y esun di APFA. Y keda den APFA te ora cu e edad di pension yega mientras cu Guardian Group ta keda renoba e contract, cada cinco aña.