E maneho di Gabinete Wever Croes a percura pa e crecemento economico di Aruba cu 2.4 % pa 2019

Diamars atardi, e reunionnan den Parlamento a continua na unda riba peticion di Parlamento, Gobierno a duna cuenta riba e situacion financiero di Aruba riba e prome mita di 2019. Prome Minister Evelyn Wever-Croes den su disertacion a expresa cu esaki ta e prome biaha den historia cu Parlamento ta haci peticion asina na Gobierno pa duna cuenta na mita di aña tambe.

MANEHO GENERAL: Prome Minister a elabora riba algun punto di e maneho general di Gabinete Wever-Croes. E Maneho di Turismo, Economia y Labor di nos pais ta bayendo den e bon direccion. Aña 2018 tawata un di e miho añanan pa cu Turismo di Aruba na unda a mira un crecemento den e total di turistanan cu ta keda Aruba y aña 2019 ta indica di ta un bon aña tambe.

E Maneho di Gabinete Wever-Croes ta dunando resultado conforme e vision di atrae turistanan di calidad. E RevPar, un di e indicadornan di mas importante pa midi calidad di turistanan a crece cu 8.2% den e prome 6 luna di 2019. Esaki ta pone Aruba na di cuater luga mas halto di mundo cu un RevPar di 259-dollar y den Region di Caribe, Aruba ta na di tres luga.

Entradanan di turismo tambe a subi cu 8.9% na 2018 compara cu 2017, na unda e turistanan a laga 500 miyon adicional atras den nos economia.

Pa prome biaha Aruba a publica un vision economico 2019-2022 pa un economia fuerte y resiliente, den cual ta describi cual ta e areanan cu lo concentra riba dje den e periodo nos dilanti pa genera desaroyo economico di cual ta forma parti 6 sector prometedor pa diversificacion di Aruba su economia.

E 6 sectornan prometedor ta den 1) diversificacion di Turismo entre otro pa Turismo di Cultura, Deporte, Aventura y Turismo Medico. 2) Economia di conocemento entre otro di technologia solar y di oceano, educacion avansa den ciencia, technologia, ingenieria, matematica y solucionnan di ICT. 3) Agricultura 4) Logistica, entre otro servicio aereo, y portuario. 5) Economia Circular, pa negoshi den material di desperdicio y recyclahe. 6) Industria Creativo, pa negoshi chikito y mediano den arte, musica, diseño grafico fotografia, diseño di website studio arte y moda.

E maneho di Gabinete Wever-Croes a percura pa e crecemento economico di Aruba cu 2.4% pa 2019, y ta premira un crecemento di 3% pa 2020 y 3.2% pa 2021. Fondo Internacional Monetario IMF a confirma e crecemento aki. E crecemento aki ta debi na e esfuersonan di Gabinete Wever-Croes pa desaroya nos economia.

Crecemento economico ta trece oportunidadnan nobo riba tereno laboral. E esfuerso di Gabinete Wever-Croes pa nos ciudadanonan haya trabouw a resulta positivo pa Aruba. Desempleo en general a mira un rebaho di 8.9% den 2017 pa 7.3% den 2018. Y desempleo entre nos hobennan a mira un rebaho di 19.4% den 2017 pa 16.2% den 2018.

Nos pais a bira mas sigur, desde cu e helicopter tey. E radar ya a haci e groundbreaking, y ta trahando hunto cu Marinierskazerne pa tene mas siguridad den nos prison.

“Den tur reto cu Gabinete Wever-Croes a confronta, nos a enfoca mas riba e ser humano poniendo e ser humano central y trece progreso y bienestar pa cada ciudadano na Aruba. Apesar cu ainda nos no ta unda nos mester ta, pero nos ta riba e bon caminda. Esaki ta e compromiso di Gobierno di Aruba y nos lo sigui traha dia y anochi pa realisa e metanan cu nos a propone apesar di tur reto financiero”, Prome Minister a enfatisa.

Comments

comments