Di parti di huesnan Hulandes na Corsou a duna di conoce cu nan kier mas personanan local y Aruba unda nos ta awe ta loke a puntra mr. Peter Lemaire di Corte Comun di Husticia di Aruba.
E ta keda un composicion mixto, ya cu ta e idea cu si ta unicamente huesnan local e ora nan lo no haya chance di un intercambio cu otro paisnan. Na Hulanda ta comun cu huesnan despues di tempo ta cambia di un otro circuito. P.e. Sra. Angela actualmente ta na Hulanda, e circuito di Rotterdam pa asina refresca su conocemento y den e sentido ey, e lo keda un composicion mixto.
Na Aruba aworaki tin un mas personal local, aunke hopi di nan ta Hulandes di nacemento. Pero ta considera nan local. Aruba no por keha, ya cu tin bastante interes bou di e comunidad local pa bira hues. E maximo di tempo cu un hues por keda Aruba ta di 5 aña pero semper e hues por solicita pa traha na Aruba.
Tambe hues mr. Peter Lemaire a sigui splica cu mester mehora loke ta e confiansa den Corte, den casonan di sentencia cu huesnan ta duna. Mester evita cu e comunidad cuminsa wak e hues como un elemento Hulandes straño, cu no ta forma parti di e sociedad.
Huesnan mester gana e confiansa di e comunidad, demostra cu nan no ta corupto, y cu nan por wordo atendi ariba cierto cosnan cu, kisas no a bay bon. Lo ta bon si por midi e confiansa mei mei di nos comunidad, con e confiansa ta den nos sistema hudicial.
Hues mr. Lemaire a sigui splica cu na Hulanda, ora cu dicta sentencia den casonan penal riba cual e comunidad ta rabia, y si nan no ta contento cu e sentencia, e confiansa ta baha. Lo ta ideal pa crea un laso di mas confiansa, di provee mas frankesa, y duna mas splicacion riba sentencianan cu ta wordo duna. E diferencia di Ministerio Publico y Corte (huesnan) tin un diferencia den begrip, pero esaki ta un poco dificil pa splica.
Hunto cu Universidad, Ordo di Abogadonan y Ministerio Publico a organisa merdianan di estudio, y tambe ta purba inclui e publico ora cu mester evalua e sentencia, ya cu esaki ta un di e puntonan mas fastioso aki na Aruba, segun mr. Peter Lemaire.