Durante e tres añanan cu el a fungi como presidente di parlamento, Marisol Lopez Tromp a trece dilanti cu un di su metanan principal tabata pa independisa nos parlamento di Aruba. Pakiko esaki ta asina importante? Paso con cu bai bin, ta parlamento ta e instancia cu
mester controla gobierno di Aruba y no contrario.
Y pa por haci esaki debidamente parlamento mester por tuma su propio decisionnan cu su propio presupuesto. Al momento parlamento tin un presupuesto cu bo por bisa ta depende parcialmente di e presupuesto di e minister di Algemene Zaken kende ta e prome minister di nos pais.
Na momento cu parlamento por fungi independientemente, e parlamentarionan lo por haci nan trabou den un forma mas miho posibel pa controla gobierno. Na momento cu gobierno tin input of algo di bisa den parlamento di Aruba, esaki por impedi e trabou di parlamento y su personal cu mester ta den un forma imparcial. Parlamento mester ta liber tambe pa, por ehempel, scoge su mes trahadornan pa haci un miho trabou posibel pa parlamento di Aruba.
Esaki ta keda un meta y a haci inicio den e ley aki pa trece cambionan pa independisa nos parlamento pero ainda falta un trayecto pa caba. Parlamentario Marisol Lopez Tromp ta kere cu unabes finalisa e trayectoria cu falta, esaki tambe lo yuda na mehora e democracia di nos pais y haci cu parlamento por tuma su desicionnan den un forma mas independiente posibel. Esey lo cumbini no solamente parlamento como instituto, pero henter e funcionamento democratico di nos pais.