E heroenan rond di nos: grupo di huesped a rescata un damita cu no tabata duna señal di bida den pool na Marriott

Den transcurso di siman pasa, un dia di relahacion y diversion rapidamente a converti den un momento di susto ora cu un damita a wordo haya ta flota sin señal di bida den piscina na Marriott Surf Club Aruba. Un grupo di huesped a tuma nota di esaki y rapidamente a saca e damita for di piscina y practica Cardiopulmonary Resuscitation (CPR) cu a resulta di ta exitoso.

Mientras cu e ta landa, e damita a bira malo y un grupo di huesped kedando na Marriott a ripara esaki y rapidamente a saca e hoben for di piscina pa asina aplica CPR. Despues di a exitosamente logra haya un pulso, e damita a wordo transporta den ambulance pa hospital pa ricibi cuido medico.

Afortunadamente e grupo di huesped aki a actua rapidamente y a rescata e damita aki. E famia di e hoben a splica cu nan no tin palabra pa expresa nan gratitud na e grupo di huespednan cu a salba e bida di e damita aki.

Como muestra di gratitud for di e ‘One Happy Island’, representantenan di Oficina di Turismo di Aruba (A.T.A.) Rayon Koolman y Kimberley Richardson a honra un total di shete huesped como ‘Goodwill Ambassador’ y na e manera pa bisa nan ‘Masha Danki’ pa nan acto heroico cu a yuda grandemente salba bida di e damita aki.
-FIN-

Comments

comments