Den e dianan nos dilanti, e contribuyentenan cu ta registra pa inkomstenbelasting lo bay
ricibi nan formulario di declaracion di inkomstenbelasting di aña 2024 via post manera custumber.
Fecha oficial
E fecha oficial di otorgamento ta 1 di augustus 2025. Pa ley e contribuyentenan ta haya 2 luna di tempo pa yena y entrega e formulario menciona; pues e ultimo dia pa entrega esaki ta dia 1 di october 2025.
Extension di termino
Banda di e termino legal di 2 luna, Departamento di Impuesto ta duna automaticamente 2 luna mas di tempo pa por entrega e declaracion aki. E fecha final pa e contribuyentenan cu kier haci uzo di e 2 luna extra di extension ta 8 di december 2025. No tin mester di haci un peticion oficial pa haci uzo di e extension (“uitstel”) menciona.
Prepara documento
Departamento di Impuesto ta recomenda su contribuyentenan pa cuminsa prepara e documentonan necesario relaciona cu entrada y gasto di aña 2024 por ehempel: salario anual, pensioen di trabou, pensioen di biehes, pensioen di viudo of huerfano, entrada di huur di propiedad, entrada di ‘side-jobs’, carta di interes di banco y/of otro instancia, seguro di bida, comprobante di donacionnan haci, comprobante di gastonan di scol di yiu cu ta studia den exterior etc.
E contribuyentenan cu tin un empresa propio (eenmanszaak), tambe mester prepara nan relato anual di aña 2024. Den caso cu e contribuyente mes no por traha e relato anual aki, ta recomendabel pa busca un consehero fiscal cu conocemento adecua di e materia di impuesto.
Obligacion legal
Yena y entrega e formulario di inkomstenbelasting ta un obligacion legal di cada contribuyente. Door di yena y entrega e formulario na tempo, e contribuyente ta evita cu e ta haya un cobransa (taxativo) cu boet.
Ademas pa medio di e declaracion, e contribuyente ta haya e oportunidad pa haci uzo di su derecho di
deduci su gastonan.
