Cada dia tin mas hende ta sufri di un malesa of otro, pero esaki ta bin pa diferente motibo paso e forma di bida cu nos ta hiba tin ora nos no ta corda riba nos salud pa cual aki Sr. Gino Goeloe, directeur di Wit Gele Kruis ta splica.
Presion halto ta hungando un rol hopi grandi na Aruba, unda cu por nota cu e edad ta bahando. Segun Sr. Goeloe, tempo cu e tabata den enfermeria, tabata papia di personana over di 60 aña cu ta sufri di presion, cholestorol, atake di curason, stroke, problemanan cu riñon, etc. pero aworaki e edad ta bahando, personana di 25 aña ya caba tin tur e problemanan di salud. Esey kiermen cu no ta bibando un bida saludabel, ta come laat den anochi y esey kiermen tambe cu no ta haci ehercicio tampoco.
Ta keda na cada persona kico e kier pa su mes y den su bida. Wit Gele Kruis ta para pa un bida saludabel y esey kiermen cu movecion ta hopi importante, 30 minuut pa dia. Tambe come saludabel, dus berdura cu fruta, mester ta algo diariamente cu bo ta come. Dicon berdura cu fruta? Pasobra den e berdura cu e fruta no tin cholesterol, no tin vet. Come hopi fibra, come pan bruin enbes di pan blanco. Ta bon pa baha man na comemento di carni cora, y come mas carni blanco, cu ta mas miho, pasobra e tin menos cholestorol, y den e parti ey ora cu cholesterol ta halto, e ta cera bo venanan.
Tur cos ta bin bek ariba e estilo di bida cu e persona ta hiba pa e persona keda move. Bebe awa tambe ta hopi importante, e ocho glasnan di awa pa dia.
Algo cu e mester paga tino ariba dje, ta stress. Pesey Wit Gele Kruis ta conseha, cu si bo tin un trabao cu hopi stress, purba relaha, cana banda di lama pa mei ora. Stress ta pone cu e organonan ta faya mas lihe, tambe e curason cu lo cuminsa pomp e sanger mas lihe cual lo conduci na stroke.
Humamento ta dañimo pa pulmonnan pero tambe pa bo adernan. Cu tempo e adernan ta cera y esey ta causa presion halto. Y esey tambe cu si bo ta huma, ta dificil pa stop. Pero segun Sr. Goeloe, awendia tin hopi manera pa stop, tin patch, tin hypnosis. Tin diferente manera pa cambia e custumber di huma sigaria, pa cual Wit Gele Kruis ta para pe.
E plataforma nacional di salud, tambe ta haci un bon trabao. Hospital, WIt Gele Kruis, Imsan, SvB, DVG, tur ta haci un bon trabao pa educa e comunidad. Algo hopi importante ta cu mester sigui hiba un bida saludabel. Pesey ta keda stress ariba esaki.
Ora den famia, tin historia di presion halto esey tambe mester tene cuenta cun’e, of curason, pasobra esey ta hereditario. Esey kiermen cu mester midi esaki regularmente, of ta cumpra un mashin na un di e luganan cu ta bende mashin di presion. Of Wit Gele Kruis tambe, e zusternan ta bin midi presion na cas. Awendia tambe den tur e boticanan, cierto dianan tin un broeder of un zuster ta midi presion cu sucu. Esey ta algo cu keda mester keda motiva e hendenan pa tuma e medida di biba un bida saludabel. Asina Sr. Gino Goeloe, director di Wit Gele Kruis a declara.