Un biaha mas por a mira riba social media un denuncia den forma di video, di con un Taxi Pirata ta opera libremente te cu a bay busca turista na porta di hotel. Aki un taxista legal a tuma e iniciativa di graba e proceso cu tabata tumando lugar na e momento ey pa mustra e lucha cu nos taxistanan ta hibando contra taxi pirata. Por a mira tambe con fresco e chauffeur di e taxi pirata a bira riba e taxista cu tabata filmando, y sin cuero di cara a sigui haci su trabou pirata pa transporta e turistanan.
Logicamente e tabata un experiencia y un bista masha mahos mes pa e turistanan cu inocentemente tuma e oferta di e taxi pirata aki. Pero tampoco por culpa e taxista legal di a reacciona riba e mal hecho di e taxista pirata. E taxista legal tabata simplemente defendiendo su pan.
Pero ken ta e autoridad responsabel pa tuma accion den un caso asina? Mientras cu tin un hopi hende ta punta dede riba Minister Romero y su Departamento di Transporte Publico (DTP), e realidad ta cu e responsabilidad pa tuma accion directo contra un taxi pirata ta di polis. Mirando cu generalmente e taxinan pirata ta autonan particular (plachi A), e unico autoridad cu por tuma medida ta polis. Pero nos por mira cu polis mes no tin e manpower tampoco pa atende casonan asina pasobra nan man ta yen.
Lo ta interesante pa sa di parti di Ministernan Bikker y Romero, encarga cu e carteranan di Husticia y Transporte respectivamente, si nan a sigui cu e task forse pa controla e taxinan pirata, manera cu nan a yega di anuncia den pasado. Pasobra si no haci algo liher, e situacion lo keda escala y cu consecuencianan lamentabel pa nos taxistanan cu ta traha legalmente pa gana nan pan di cada dia.
