E falta di docente ta keda un preocupacion y pesey mester bay Hulanda segun Jossette Daal directora di SKOA.
Tin un falta di docente, manera menciona. Tur aña SKOA ta bay Hulanda busca docente y e no ta bira mas hopi cada biaha. Loke ta haci ta, ta cambia e docente pasobra awendia e docentenan cu ta bin Aruba ta muchanan hopi jong. Nan ta bin pa un aña so y lo mas hopi dos aña. Nan no kier keda mas tempo. Pa nan loke cu SKOA ta ofrece nan ta un bon guia, nan ta haya un bon experiencia. Ta spera e ora cu ora nan bay bek, nan haya un trabao na Hulanda, pasobra na Hulanda ta dificil pa haya trabao den enseñansa. Y tin un parti cu ta keda, nan ta keda Aruba, nan ta establece nan mes aki.
E baymento di Hulanda no ta cu cada bes ta bin cu mas. Ta cambia locual a bin e aña anterior, y ta cambi’e pa nobo. Hopi biaha e nobonan ta hendenan cu a yega di bin caba. Esey ta bezig ta haciendo. E ta bin pasobra na Aruba mes no ta forma suficiente docente pa drenta enseñansa. Tur eseynan ta reto di enseñansa. Ta aporta tambe kico e mester ta, kico un maestro Arubiano mester ta, con e mester ta, kico nos ta spera di dje. Ta den e proceso eynan naturalmente, hunto cu pais Aruba, cual ta bezig cu esaki.
Cuanto tempo ta bay dura, no tin un bista riba esey. Pero e parti importante ta cu tin un bon comunicacion. SKOA ta un stakeholder den esaki pa papia cu kico ta bay haci cu formacion di un maestro Arubiano. Esey ta hopi importante segun Daal. E ta un reto.
Segun Josette Daal, hopi hoben no tabata mira opcion den e region aki. Esey por ta hunga un rol. Nan ta mira un opcion manera Merca, Canada, Hulanda, Costa Rica te hasta. Loke ta bin nobo awor cu ta hopi interesante y hopi motiva y hopi inspirante ta, cu mas y mas ta mira e cooperacion entre e islanan. Manera un universidad di Aruba, Corsou, St. Maarten, por mira e cooperacion. E hoben no mester bay leu for di cas. E ta bay haya e opcion pa e por studia den e region akinan mes. Un di e opcionnan ta bay ta e maestro di scol. Esey ta e parti, segun Daal.
Cuanto experiencia tin cu nos ta biba afo, sali for di Aruba, bay biba na Hulanda, e ta un stap hopi grandi. Pa cuminsa mester custuma cu e cultura, pero tambe e clima. Si un hoben bay Augustus, un djis ta winter y scur, ta lanta den scur y ta bay scol den scur y ora yega cas ta scur. E tin un impacto riba bida di un hoben, siendo cu awor aki, manera cu Daal ta mira, e desaroyonan positivo cu ta biniendo ta, cu e hoben ta bay haya e oportunidad di studia den su mesun region.
Kico ley ta bisa pa tin tanto mucha den klas si mira cu tin klas na scol ta riba 30 mucha. Riba esaki Josette Daal a contesta cu ley ta bisa cu por split, ora tin 36 mucha den un klas. E no ta sano, pero no tin mas luga. Esey no ta scol di SKOA so. E ta conta pa tur scol na Aruba. E instroom di e muchanan ta hopi halto. Si cuminsa wak’e na Noord, pa motibo cu hopi hende di San Nicolas ta bay traha den area di hotel, kiermen ta bay busca pa biba den e area di Noord. Por mira awor aki Playa ta birando hopi yen, Paradera y ta cuminsa yega Santa Cruz.
Mester bay wak awor aki cuanto den SKOA su caso, pa wak con grandi e porcentahe ta y e pensamento ta cu probablemente mester bin un scol mas.
Ta cosnan cu lo tin cu bay wak, segun Daal. E otro parti positivo ta, cu si e refineria habri, e ta brinda trabao atrobe. San Nicolas si ta bira bashi. Pero si e refineria habri cu e ta crea oportunidad pa trabao atrobe, e ora San Nicolas, e hendenan lo bay biba eynan, pasobra nan ta mas cerca di nan trabao, e ora por parti e muchanan atrobe, pasobra e scolnan di San Nicolas si ta gruponan mas chikito. Cu excepcion di Colegio San Nicolas, cu si mester wordo expandi mas. Cual ta bon. Ta duna muchanan oportunidad e ora ey di no tin nodo di bay leu for di cas pa cierto tipo di enseñansa.