Aruba su poblacion a crece ultimo temponan aki, ya casi e ta riba 120 mil habitante. Y esaki a trece un presion enorme ariba e klasnan. Minister di Enseñansa, drs. Rudy Lampe, ta splica con lo atende cu esaki.
E mandatario a bisa cu enberdad, scolnan pabao di brug tin un demanda grandi pa cuponan escolar, y e presion ta enorme. Esey ta haci cu e docentenan ta, vooral den e scolnan publico, unda cu tin e obligacion di tuma muchanan cu ta pidi pa enseñansa, e klasnan a bira enberdad, hopi grandi. Esaki ta un peso grandi pa nos docentenan.
Gobierno a cuminsa cu e maneho aki, cu ta bay den e direccion di Modulair Sisteem. Esaki ta un un sistema di proefwerk. E desaroyo tecnologico ta asina avansa, cu e periodo di huur trailer ya practicamente pa pasado. Aworaki ta hopi mas barata, hopi mas stabiel, cu e por wanta hasta un horcan. E construccion modular aki ta haci cu e direccion ey lo mester bay. E ta keda un reto si, pa cual gobierno ta purba den dialogo cu e mayornan, unda cu tin scolnan pariba di brug. Ta bon pa no saca esaki for di balansa, unda cu pabao di brug tin hopi alumno y pariba tin hopi menos. E ta un reto grandi e explosion demografico aki.
Tin tambe, segun e mandatario, e fluho migratorio cu ta yega Aruba. Tur mucha tin derecho di enseñansa, sea legal of ilegal. Aruba ta mara na tratadonan internacional. Y esey, ta un peso di berdad, ariba e infrastructura escolar.