Awe un otro fase di eleccion parlamentario ta tras di lomba. E partidonan a haya nan secuencia riba e lista di votacion pero tambe nan color.
Mester bisa cu ta prome biaha Aruba tin 12 partido politico cu ta participa den un eleccion pa Parlamento. Y awe nan mester a pasa den e proceso pa mira cual number y color nan lo haya riba e stembiljet.
E resultado a duna e siguiente secuencia: 1) Accion21 (Shinishi cla); 2) PPA (Oranje); 3) MAS (Blauw cla); 4) UPP (Cora); 5) MEP (geel); 6) HTC (roos cla); 7) POR (Blauw scur); 8 AVP (Berde); 9 PP (biña cla); 10) CURPA (Biña scur); 11 Raiz (Shinishi scur); y 12) RED (Blanco).
Awo ta bay manda print e stembiljetnan y mester cuminsa reparti carchinan di voto. Mester wak bon na ki urna ta bay vota. Door di expansion di e poblacion, mester a aumenta e cantidad di urnanan. Cada urna tin mas o menos 1000 votado. Tin urnanan cu tabatin den e ultimo eleccion y no t’ey mas y tin ciudadano cu lo bay vota na otro urna compara cu ultimo eleccion. Esaki ta debi, segun director di Censo y Registro Civil mr. Sharlin Luidens, cu tin areanan cu tin demasiado hopi habitante y e ta pasa mas cu mil votado.
Historia
Aruba desde tempo di constelacion Antiano a conoce diferente partido politico. Tin cu ta existi ainda y otronan a bini despues. AVP y PPA ta e partidonan di mas aña di existencia. .
Esnan cu a yega di existi na Aruba y no t’ey mas ta: Accion Democratico Nacional (ADN); Accion Democratico 86 (D’86); Aliansa Democratico Arubano (ALIANSA); Concentracion pa Liberacion di Aruba (CLA); Convergencia Royalista Nacional (CORONA); Cristianan Uni pa Aruba (CUA); Movimiento Liberacion di Aruba (MLA); Movimiento Patriotico Arubano (MPA); Movimiento Socialista Arubano (MSA); Movimiento Social Independiente (MSI); Organisacion Liberal Arubano (OLA); Partido Democratico Arubano (PDA); Partido Democratico Cristiano (PDC); Partido Democracia Real (PDR); Partido Independiente Arubano (PIA); Partido Patriotico Nobo (PPN); Partido pa un Aruba Restructura Awo (PARA); Partido Revolucionario Obrero (PRO); Partido Sunnum Bunum (PSB); Plataforma Politico di Trahadornan (PPT); Reformistanan Uni pa Bienestar di Aruba (RUBA) y Union Nacional Arubano (UNA).
