Stichting Positive Foundation a lansa aña pasa e vision ’Aruba Bo ta Bendiciona’ y a organisa dos concierto di gospel masha exitoso den luna di november. Durante e conciertonan aki Positive Foundation a trece speransa y alegria cerca tur cu a presencia e conciertonan, especialmente cerca nos hende grandinan cu a sinti berdaderamente con bendiciona nos dushi isla ta.
E aña aki Positive Foundation ta organisa e di dos concierto di gospel ‘Aruba Bo ta Bendiciona’ diadomingo awor dia 18 di november, di 7or di anochi pa 9or di anochi den Cas di Cultura.
E biaha aki cu un elenco impresionante di nuebe cantante renombra cu lo bai presenta nan mihor cancionnan di gospel. E artistanan local invita ta: Junior Garcia, Ezequiel Antony, Rocco Franken, Eltienne Yarzagaray, Abril Morales, Shannon Bueno y Hilyann Croes. E artistanan invita for di Curaçao ta Angelique Klooster y for di Hulanda e cantante cu varios hende a pidi p’e Willy Rodriquez.
Glen Penniston di Positive Foundation cu su vision di ‘Aruba Bo ta Bendiciona’ ta organisa e di dos concierto di gospel aki pa concientisa cada cuidadano con bendiciona nan ta pa biba riba e isla maraviyoso aki. E concierto di Gospel ‘Aruba Bo ta Bendiciona’ ta wordo organisa en especial tambe pa nos hende grandinan, pa nan tambe sinti cu Aruba ta aprecia y balora nan pa tur locual nan a nifica pa nos comunidad. E aña aki un bes mas varios hende grandi lo por bin presencia e di dos concierto di gospel ‘Aruba Bo ta Bendiciona’ danki na e patrosinadornan manera Aruba Bank, Aruba Store, ATA, De Palm Tours, Digicel Aruba, Do It Center (Shaba), Stichting Funari, Grant Thornton (PwC), Hitess N.V., Hyatt Regency Aruba, La Cabana, Ling & Sons, Ruth’s Cakes, Setar N.V., Simon Andrade Group, The Perfect Team, Talk of the Town, Total Finance, Zeerovers y algun individualnan cu a opta pa keda anonimo.
Positive Foundation ta yama danki na tur e partnernan aki cu a haci posibel pa e hendenan grandi por presencia e concierto. Si tin mas instancia cu kier coopera pa mas hende grandi por presencia y disfruta di e concierto di gospel aki por manda un email na [email protected].
Positive Foundation ta invita un y tur pa bin presencia e di dos concierto di ‘Aruba Bo ta Bendiciona’ y asina sinti y biba con bendiciona cada un di nos ta y con bendiciona nos isla ta na tur momento. E carchinan na balor di AWG 35,= ta na benta na Citgo Boulevard, Citgo Essoville, Dowco Sta. Cruz y Gallo Rojo.