Un bes mas Health Care Conference Aruba lo bay tuma luga den luna di Juni. Durante un conferencia di prensa, Minister di Salud Publico, dr. Alex Schwengle, a splica riba e meta di e evento aki, cual sigur durante e prome biaha, tabata un exito.
El a splica cu e prome conferencia tabata na Juni 2015. E no tabata un iniciativa di Gobierno, sigur no di e minister. Pero un iniciativa di Parlamento, unda cu IPKO, unda cu e parlamentonan di reino ta topa regularmente, a acerca minister Schwengle, pa organisa un conferencia pa discuti salubridad, vooral den e contexto di islanan chikito y den contexto di colaboracion, unda cu ta kere cu colaboracion ta algo esencial, tambe den Salubridad, pa no solamente aumenta e calidad di cuido riba nos islanan, pero tambe pa mira unda cu nos por tin beneficionan, win-win, pero tambe nos por spaar placa. Y si bo spaar placa, bo tin mas pa inverti den mehoracion di bo cuido.
E tabata den concepto di e minister, un bon exito. Tabata tin rond di 300 participante y un di e metanan tambe tabata pa trece e tres gruponan hunto. Politiconan, esnan cu ta traha riba ley, esta Trahadonan di Directie Volksgezondheid, AZV, SVB y no lubida e profesionalnan.
Dicon e minister a haya esaki importante, pasobra el a bin di un otro banda, tempo e tabata traha como longarts, e fase di confianza, vooral di profesionalnan den direccion pa politiconan, tabata demasiado grandi. Decisionnan haci pa politiconan tin biaha ta mucho di un banda y no ta tene cuenta cu e mundo di profesionalnan.
E prome biaha caba a splica dicon ta importante pa sigui cu e evento aki pasobra e prome a mustra cu nos por traha hunto y e aña aki esaki lo ta mesun cos pa loke ta cuido integral.
E conferencia aki a trece bon fruto. El a trece algun punto di critica den e maneho cu a adapta na caminda. E tin beneficio so pa tin conferencia asina riba nos pais.
Minister Schwengle a splica cu a pidi pa haci’e tur aña, pero esaki no tabata posibel pa diferente motibo y cada dos aña lo ta na su luga. E prome aña a bisa cu lo trata colaboracion, vooral pa e aspecto di isla chikito, kico tur ta e desafionan cu tin como isla chikito y e aña aki lo enfoca riba loke ta yama cuido integral (Integrated Care) Ta un topico hopi hot den e mundo di cuido internacional. Organisacionnan manera Nacionnan Uni, WHO, PAHO, pero tambe organisacionnan manera OECD, cu ta un organisacion internacional cu ta trece paisnan hunto pa papia con ta desaroya bo pais mas miho posibel y ten’e financieramente factibel. Tur ta bisa cu esaki ta e topico mas importante na e momentonan aki, cu tur pais cu kier tin un cuido financieramente saludabel, ta importante pa haci’e na un manera integral. Cu tur grupo den sociedad ta traha hunto. Politico ta traha bon cu profesional, etc. E liñanan mester comunica bon cu otro y ta evita cu ta malgasta placa y cu e placa ta wordo uza mas eficiente posibel y haciendo stapnan dilanti pa trece un miho calidad di cuido pa bo pueblo.
Schwengle ta hopi orguyoso, pero ta hopi trabao si, pero tin un grupo chikito di varios hende cu ta traha riba e conferencia y tambe ta orguyoso cu lo bay tin bon orador e aña aki atrobe.