E desaster dilanti ex Codemsa no ta aceptabel mas

Diahuebs, minister di Infrastructura, Sr. Otmar Oduber a haci un recorrido den e diferente areanan cu semper tabata tin cierto problemanan, specialmente Vos Boulevard pero tambe otro partinan di Aruba, unda cu awasero ta yobiendo y cu e tera ta satura.

DOW kier tuma e medidanan necesario di delanta, unda cu dos siman pasa a combersa cu DOW tocante e supervision di Watty Vos Boulevard, y a topa cu esunnan responsabel pa e trabaonan, es decir Motta Engel, y a reitera cu loke ta tumando luga en todo caso dilanti Codemsa/Kooyman no ta aceptabel y cu gobierno no ta bay acepta esaki mas. A instrui DOW pa tuma e pasonan legal den cuadro di un contract cu a wordo traha, cu ta mara e mannan di gobierno hopi duro. Esaki ta lesnan cu mester wordo siña di dje. Pero e problema no ta na Codemsa so, pero na Tanki Leendert tambe tin awa ta para formal den e area y Motta Engel ta encarga pa deal cu e parti aki. No ta camindanan habri ainda, ya cu nan ta pafo di e rotondenan. Pa augustus otro aña e trabao mester wordo entrega. Y ta yega momento pa pone responsabilidad ariba trabao cu no ta tumando luga conforme di loke gobienro ta spera. E ta crea un scenario rond di Aruba, vooral unda ta construyendo Watty Vos Boulevard, ta birando hopi incomodo pa nos hendenan.

Semper ora tin desaroyo, cu tin proyecto, e ta crea incomodidad. Pero den e caso aki, awa a pasa hariña, surpasando e liña y ta mustra Motta Engel ariba esaki tambe. Pronto reunionnan lo cuminsa, unda cu tin e parti legal di gobierno ta studiando e contract pa mira kico por wordo haci mirando cu ta te na Augustus proyecto ta wordo entrega.

Tambe e mandatario a bishita Green Corridor, Pos CHikito riba e caminda grandi cu semper ta yena cu awa, ta pomp e awa sak’e afo na Savaneta patras. Tambe Sta. Cruz, patras di Kentucky, a pone pump di DOW pa atende cu e awa cu tin para eynan. Y algun otro luga cu a pone naturalmente atencion ariba dje, pa evita cu si awa sigui yobe cu lo tin problemanan den oranan di anochi.
E team completo di DOW tabata ariba caminda, haciendo anotacionnan unda ta sinti cu e saturacion di awa por tuma luga, mirando cu si e awa yobe den marduga, e lo ta hopi mas dificil pa atende cun’e. Durante dia di diahuebs por a mira e mobilisacion di e ekipo di DOW, cu truck, bobcat, pa si santo subi caminda, atende cu esaki di biaha. A atende cu cierto partinan, cu e duikernan, y den Madiki trempan a percura pa esaki ta limpi.

E mandatario sigur tabata tin palabranan di elogio pa e personal di DOW cu a mobilisa diahuebs den oranan di merdia pa atardi, y nan lo keda pendiente di awasero cu lo sigui yobe. Tambe e mandatario a topa cu e CEO di Motta Engel, caminda cu di parti gobierno e mensahe tabata bon cla, unda cu a inform’e cu no tin espacio pa tolera mas, unda cu DOW a haya e mensahe pa cuminsa wak e aspecto huridico pa cuminsa actua ariba esaki, segun e mandatario di Infrastructra, Sr. Otmar Oduber.

Comments

comments