Sra. Stephanie Boekhouwer, di e Grupo Millenials, ta splica di unda e idea di e debate a sali y unda lo kier yega cu e debate pa e grupo di hobennan. Grupo Millenials ta un grupo amplio di hobennan cu a bin hunto pa forma un debate cu lo bay contesta algun pregunta y preocupacion pa cu e eleccion binidero. Tabata tin varios encuentro pa asina bin cu idea y asina formula un formato cu nan ta sinti lo por brinda e contestanan akinan na un manera constructivo y honesto pa tur partido participante. Asina nan a yega na e formato, unda lo bay tin un moderador, cu lo haci e preguntanan. Tambe e moderador lo sigura di cu tur participante lo keda al caso, pero tambe ta contesta nan pregunta dentro di e tempo stipula. E lo zorg tambe pa e participantenan no falta otro respet. E debate mester ta constructivo y honesto pa tur persona. Na momento cu un di e participante no mantene su mes na e regla, e microphone lo wordo cera pa asina sigui cu e siguiente participante.
Sra. Boekhouwer a sigui bisa, cu den e prome ronde lo tin pregunta riba diferente topico cu lo wordo haci na tur dies participante. y nan lo duna nan respuesta na tur esaki. Despues di esaki lo tin un break chikito.
Despues di e break, lo bay yama cada biaha dos participante y e resto ta keda patras di stage. Loke ta bay ta diferente, ta cu e dos personanan cu ta ariba stage ta debatiendo, e hendenan patras, tin oportunidad di dicidi si nan tambe lo kier elabora ariba e debate, pero cada participante ta haya un chance so. Dus si tin 5 ronde, di dos debate ta tumando luga, tur hende tin mag di dicidi un biaha so si nan ta elabora ariba e debate aki.
Na final di e debate, ta cera e anochi, tambe, segun Sra. Stephanie Boekhouwer.