Un punto clave di e crisis social ta cu esaki no ta di aworaki, pa cual Sra. Glenda Hernandes di DAS ta splica tocante un estudio haci na 2016-2017. Sra. Hernandes ta amplia.
E estudio aki a termina den un analisis social, caminda cu e situacion social di Aruba a saca hopi datonan afo cu tabata un shock pa tur hende. Por wak muchanan cu no ta hayando nan diploma secundario, 4 di 10. Ta wak un porcentahe di desempleo bou di adultonan, mas tanto den hobennan. Ta wak un generacion cu ta wordo poni un banda, cifranan di atraco, traficacion. Ta cifranan hopi espantoso, esey ta e cifranan real.
E poblacion a redobla na 1990, pero ta wak e servicionan social no a redobla. Pero al contrario, a wordo bezuinig ariba subsidio di diferente fundacionnan. Servicionan social no a crece. Y awo lamentablemente ta haya confronta cu e crisis social cu a explota, cu a fulmina den e morto di dos criatura inocente. Pero ainda nos no a ‘hit rock bottom’. Por wak esey den atraconan cu ta tumando luga. Por wak esey den hopi cifranan di nos hendenan di edad cu ta wordo abusa. E ta manifesta su mes ariba casi tur tereno. Hustamente ta bisa cu esaki ta un culminacion di gobiernonan anterior cu no a duna niun atencion na e problema aki. Awo por sinta warda te ora cu e afecta turismo, e pilar economico esencial of ta lanta y cuminsa actua.
Departamento di Asuntonan Social ta trahando hopi duro, for di aña pasa. Prome mester a traha un plan pa e bay gobierno, pa hinca esaki den e presupuesto. A papia cu tur instancianan pa bin cu’n plan. Despues cu e placa a wordo sigura, DAS a bin cu’n proposicion pa e placa wordo uza pa tal destinacion, pa hinca esaki den un fondo social. Esaki ta haci cu e placa no ta bay bek, pero ta keda reteni pa e metanan social. Pa esaki Sra. Hernandez ta bezig cu diferente departamentonan y cu e Ministeriele Beschikking pa duna placa na e fundacionnan pa nan cuminsa cana.
E ta canando ariba diferente tereno. Departamento di Asuntonan Social tin un registro social di famianan di menos recurso, unda cu e riesgo ta hopi halto, pa e wordo implementa den e 4 sectornan. Nan ta bay den cada bario, asina un mucha nace, pa wak e riesgonan den famia, pa esaki tambe wordo registra. Ta brinda apoyo na mayornan cu mester di ayudo. Nan ta bezig na diferente front ya cu nan ta bezig ta yudansa na e mama soltera cu ta haya yiu trempan, cu ta bin cu problemanan social. Ta yuda nan, mirnado cu Casa Cuna tin un Tienerproject unda ta siña e mamanan con pa cria nan yiu.
Otro aña lo bay yuda e hoben handicap cu tin hopi problema na cas, lo brinda nan un luga na un Centro di Cuido na San Nicolas. Esakinan ta puntonan esencial cu DAS ta bin cun’e. Tambe lo bin cu’n centro di hoben y famia, ora cu algo ta pasando DAS lo yuda e mayornan con pa cria nan yiu. Ta papia cu nan, dunanan curso, ta duna nan guia, segun Sra. Glenda Hernandez, directora di Departamento di Asuntonan Social.