Mike de Meza: Si abo ta un di e personanan cu a kere cu prome minister Mike Eman lo tabata di e bibo y sabi ey pa, despues di e retiro di Otmar Oduber, apunta un minister capabel y sabio riba e puesto di turismo pa di e manera ey ainda keda cu un oportunidad pa haci un bon papel den e proximo eleccion na september, bo tambe a kiboca bo mes colosalmente.
E asunto aki ya no ta interesa Mike de Meza ningun bledo mas, pasobra segun informacionnan ricibí, e Mike aki lo bandona politica pa fin di September proximo y lo e no subi lista mas.
Mesun cos nos ta ripara den turismo: bo no ta weit’e ningun caminda, y e no ta mustra ningun interes.
Ta p’esey tambe bo por a constata e siguiente locuranan di siman pasá:
Turismo na Aruba ta den un crisis hopi profundo, pero toch ATA no por a pensa di usa su fondonan disponibel mihor cu di cumpra e edificio bieu di DOW, cu e intencion di restaura esaki pa e bira e oficina nobo di ATA!!
Bon, den e tempo di crisis aki ATA no sa di haci cosnan mas urgente na luga di atrobe bay muda pa un otro localidad?
Di mesun manera cu no tabata falta nada na e edificio di ATA na Eagle tempo cu ATA a muda pa pabao di Strand Hotel, awor aki tampoco ta falta nada na e oficina di ATA cu by the way ta hopi nobo ainda.
Pues, mescos cu tabata e caso tempo cu a bandona e edificio na Eagle, awor aki tampoco ta existi ningun motibo valido pa ATA muda atrobe; ningun motibo pa ATA dedica su tempo na compra innecesario di edificionan y nan restauracion.
Ta ki locura y ridicules esaki ta! Unda e miembronan di Board of Directors di ATA a keda! Kico AHATA, como principal partner di ATA, ta opina di esaki!
Y finalmente, kico Parlamento di Aruba a haci na esaki, specialmente en bista di e actual estado di emergencia di nos turismo??
Mike Eman y Mike de Meza no sa di haci nada miho cu e Bushiri Hotel bieu, cu …….exactamente: haci nada!!!
Si! Bo a lesa bon! Sinta man cruza, y HACI NADA!!!
Que hubo di crea un parke cu hotelnan chikito estilo boutique, cu “niche”-nan (“specialité”) nobo manera pa e mercado di 5 strea, e mercado dirigi riba e solteronan, e mercado Brasilero, y acopla na un hotel asina un scol pa enseñansa den ramo di hotel (hotelopleidingsschool), un beach manera e “Venice”-Beach na California cu deportenan di beach manera tennis y volleyball di beach, café- y barnan a lo largo di e espacionan pa peaton, Xsports (extreme sports) y rollerskating?
Ay no, toch no! E Gobierno di AVP aki sin vision lo no por ehecuta esaki toch. Miho nan no haci nada cu Bushiri y su vecindario; yega September proximo, e Gobierno nobo si lo por bay haci’e!!
MASTERPLANNING, E CIUDAD SANYA NA HAINAN
Manera mi a indica den un articulo anterior, e “masterplanning” describi den e Hainan International Tourism Island Development Plan, ta ser ehecuta actualmente riba e isla Hainan, pa haci di Hainan un destinacion pa vacacion, luhoso y famoso internacionalmente.
E masterplanning di turismo na Hainan ta encera:
e masterplanning total y completo di turismo; e posicionamento di hotelnan di acuerdo cu nan “niche”, nan specialidad, y e diversificacion di mercadonan;
e productonan hotel y restaurant;
transporte tanto internacional como nacional (local) pa turistanan, manera lineanan aereo, transporte riba tera, taxinan, companianan di tour;
actividadnan, sightseeing, eventonan especial;
tiendanan y shopping;
otorgamento di tereno pa hotel, restaurant, tiendanan turistico, y actividadnan;
exigencianan pa conocimento di e ramo, y permisonan pa operacion pa e sector turistico;
entrenamento y preparacion pa henter e sector di acomodacion
(“ hospitality”);
e maneho di permisonan pa personal stranhero pa henter e sector turistico;
e maneho total di calidad, y e otorgamento di strea y diamante;
e mercadeo completo y e promocion di Hainan y di e ciudad Sanya.
E 45 TIPONAN DI HOTEL
Mundialmente e siguiente alrededor di 45 tiponan di hotel ta ser reconoci (pa facilita reconocimento di categorianan, den mayoria caso ta mantene e indicacionnan den idioma Ingles):
business hotels, resort hotels, airport hotels, convention hotels, casino hotels, motels;
low-rise hotels, hi-rise hotels;
timeshare hotels, condominium hotels, residence resorts;
transient hotels, all-inclusive resorts, residential hotels, extended stay hotels;
family resorts, singles resorts, couples resorts, adults-only resorts;
boutique hotels, lifestyle hotels, spa resorts, golf resorts, sports hotels;
mega resorts (Atlantis), Holiday villages, B & B hotels (bed & breakfast), villa and private rentals, Airbnb accomodations;
chain hotels, owner operated hotels, franchise-hotels, managementcontract hotels, affiliated hotels;
hide-away resorts, eco-lodges;
hotelnan tipico (p.e. e “pousadanan” di Brazil, e “auberge”-nan Frances;) hostels (e.o. posadanan pa hubentud/”jeugdherberg”, Stayokay); Milennium hotels (p.e. AC hotels, W hotel, Indigo, Andaz, Aloft);
hotelnan di 2-, 3-, 4-, 5-, 7 strea (“5-star hotel”).
Na Hainan a ser planea cu hopi cuidao y cautela ki sorto, clase y tipo di hotel tabata necesario y deseabel, con e hotelnan ey mester posiciona nan mes (di acuerdo cu nan specialidad), y cua mercadonan mester ser explora, tanto e paisnan di e potencial bishitantenan, como e mercadonan “niche” y e tipo di turistanan na e paisnan ey.
E pasonan di “masterplanning” di turismo ta:
1: Posicionamento di hotelnan y e desaroyo y construccion di un mayor diversidad den e oferta di e producto hotelero.
2: Sa con pa acerca y atrae e mayor cantidad di “niches” di potencial bishitantenan (diversificacion di mercadonan), completamente di acuerdo cu e tiponan di hotel y e diversidad den e oferta di e product hotelero.
3: Promocion di e destino den mas hopi paisnan posibel (diversificacion di paisnan/mercadonan) mediante un maneho di aviacion.
4: Desaroyo di tur e diferente facilidadnan cu ta parti di e promocion, manera canchanan di golf, spa-nan, casinonan, watersports, restaurantnan, barnan, etc. a base di e posicionamento di hotelnan y e diversificacion di “niche”-nan, mercado y paisnan.
Di e manera aki e oferta di hotel (posicionamento), mercadonan y “niche”-nan (diversificacion) lo ta den balans, un cantidad mas diversifica posibel di turista ta ser atrai sin demasiado competencia entre e hotelnan, mas hopi bishitantenan posibel for di mas hopi paisnan posibel ta yega Aruba, di manera cu tur e componentenan di e producto Aruba ta conforme y di acuerdo cu locual e bishitantenen ta desea.
Den algun palabra, ta esaki bo ta yama MASTERPLANNING !!
E GOBIERNO, DE MEZA, Y ARUBA
Tempo di e expansion grandi den e cantidad di hotelnan inmediatamente despues di 1986, e Gobierno di AVP bao di Henny Eman no a haci nada riba punto number 1, punto principal di masterplanning, esta e posicionamento di hotel y e diversidad den e oferta di hotel; y awor aki atrobe e gobierno di AVP bao di su ruman Mike Eman a expande e cantidad di camber di hotel enormemente, pero un biaha mas sin ningun masterplanning, sin ningun posicionamento di e oferta di hotel.
Y esaki ta resultando fatal! Casi bo por bisa cu e cos aki ta criminal!
Den un proximo edicion lo mi elabora riba e manera – mi mester yame bobo! – cu aki na Aruba “nos” ta atende nos turismo.
Remigio A. R. Wever
Ex-director ATA
Savaneta, Februari 13, 2017