Bo tambe a weita e potret, segun mi den Amigoe di dia 23 di Februari ultimo, mustrando e feliz pareha recien “casá” Otmar Oduber y Marisol Tromp?
Si bo tabatin e suerte ey, bo no ta haya cu e amor ta briya y ta resplandece for di cara di ambos?
E potret tabata mustra un pareha locamente enamora cu otro, e dosnan ta wak otro profundamente den wowo, antoha, ansha y cu un anhelo profundo, pasobra e potret tabata duna e impresion cu casi nan no por warda pa subi cama mesora despues cu e fotoshoot caba.
E felicidad ta briya for di nan cara, y nan mester a haci basta esfuerso pa no mishi cu otro.
Wel! Con cos por cambia den politica di AVP!
Ta bon pa recorda lectornan cu aki ta trata di e minister di turismo kende a destrui turismo pa Aruba completamente cu su mal maneho y su cifranan eleva, exahera y engañoso di turistanan camufla (“pseudo toerist”) Venezolano cu ta bishita nos isla djis pa raspa carchi na nos mashinnan di ATM y cumpra nan comestibles den supermercadonan.
E PRODUCTO HOTELERO DI ARUBA
Den su casi 8 añanan como mandatario, Otmar Oduber no a haci nada, pero absolutamente nada na adkisicion di cadenanan renombra di hotel; den otro palabra nada a ser haci pa atrae cadenanan renombrá pa establece nan mes na Aruba.
Pa e motibo ey awor nos ta sinta cu modelonan di camber di hotel totalmente anticua, manera Holiday Inn cu su cambernan espantosamente chikito y minusculo di 300 pia (28 meter) cuadra.
Of un Hilton hotel, atrobe un cadena totalmente anticua; y pa no menciona mes RIU y Barcelo hotel, nombernan di hotelnan “all-inclusive”, cu ta ocupa e ultimo luganan pa locual ta trata calidad, producto, facilidadnan, y encanto di arkitectura.
E cadenanan aki ta conoci pa ta ofrece paketenan all-inclusive barata (“budget”- all-inclusives), mientras cu tur caminda den Caribe e mihor cadenanan moderno manera Grand Vela, Royalton, Zoëtry, Kimpton, Banyan Tree, Sandals y Atlantis, ta construyendo e hotelnan di mas espectacular cu suites y “swim-out” suites (suites cu un patio cu via un rio ta conecta directamente cu e pool; esaki ta haci cu e huesped lo landa un tiki prome cu e yega na e pool mes), cu ta responde na e demanda- y exigencianan di mas moderno di e turista, cu modelonan completamente nobo di bañonan y mobilario di camber, cu jacuzzinan “en-suite” (jacuzzi, badkuip pega cu e cama, pues no scondí den e baño; esakinan ta hopi popular cerca “honeymooners”), “sky-pools” (piscinanan chikito den balcon di camber riba e pisonan mas halto, comosifuera nan ta “zweef” den aire, p’esey tambe e indicacion “sky”; esaki ta e ultimo moda den diseño), e piscinanan di mas bunita cu “lig”-stoelnan den e awa di e piscina, spa-nan, y e miho restaurantnan cu ta ofrece experiencianan culinario unico, dirigí pa asina yamá “Star Chefs”, esta Chefkoknan (“chefs de cuisine”) di renombre, y celebridadnan riba nan mes, hopi bon conocí y famoso, di kende nan nomber ta bay man den man cu hotelnan famoso manera Ritz Carlton y Four Seasons.
E “Star Chef”-nan aki ta prepara nan menunan cu nan especialidadnan, nan ta entrena full e personal, y nan ta responsabel pa e restaurant.
Un hotel di prome categoria cu ta respeta su mes, nunca lo sobrevivi cu platonan mediocre di segunda calidad: nan platonan di berdad mester ta lo maximo!
Y aki na Aruba nos ta keda sinta cu cadavernan bieu manera Holiday Inn y Hilton, banda di e peor hotelnan all-inclusive manera RIU y Barcelo.
Pakico un turista lo kier bin Aruba pa e keda den un hotel Hilton anticua y chapo – cu un mita pida playa, unda ademas e lo ta testigo di e pleitonan constante entre diferente operadornan di watersports y bendedornan di droga, y un awa di lama vies – si e por keda tambe den un fantastico “lover’s suite” di e Royalton Hotel Riviera Cancun, un hotel cu NINGUN hotel por iguala, hunto cu un interior di un pais grandi manera Mexico, yen di placer, cultura y cosnan di haci.
No, turismo na Aruba a yega na su fin pa motibo di nos producto desastrosamente anticua, restaurantnan malo, nivel di prijs demasiado halto, y masha tiki cos interesante di haci.
Aruba ainda ta steun y ta bibando riba e gloria di antes; sinembargo aki e turista ya no ta haya at all locual e por haya den e resto di Caribe, y esaki pa mucho menos placa!
BAO E GUIA POBER DI OTMAR ODUBER, TURISMO DI ARUBA A KEDA PEGA DEN AÑANAN 60 Y 70 DI SIGLO PASA.
Holiday Inn, Hilton, Barcelo, RIU, Divi-all-inclusive, nan tur ta dirigi nan mes riba e turista barata.
RIU, Divi y Barcelo, tur tres ta ser menciona como “budget all-inclusives” (hotelnan all-inclusive barata), unda e departamentonan di Benta y Mercadeo mester percura pa trece mas hopi turista posibel aden; esaki a para bira un negoshi di bula nek afor (“cut throat-business”) cu margennan di ganashi chicito, cu no ta duna espacio pa un bon cuido y trato di e cliente y di e propio personal.
Hotelnan, cambernan di hotel y nan facilidadnan a cambia enormemente, y e desaroyonan (“trends”) aki a haci nan entrada especialmente alrededor di aña 2008, esta tempo cu Otmar Oduber a bira minister di turismo; lamentablemente Otmar Oduber NO a ripara nada di e desaroyonan aki, y pues no a inclui nan tampoco den su maneho.
Pa esaki Otmar Oduber mester wordo tení responsabel; e a laga turismo di Aruba keda den siglo 20, na lugar di modernise, prepare y guie pa drenta siglo 21!
SAN NICOLAS
E bobedad y e incompetencia di tanto Otmar Oduber como prome minister Mike Eman y e gobierno aki di AVP, nos ta weita bek tambe den e preferencia di Otmar Oduber pa scoge un Don Pablo Collection/Bahia Principe como futuro constructor y operador di hotel na San Nicolas.
Atrobe un nomber inferior!
San Nicolas ta presta su mes hopi bon pa un “mega-resort” manera Atlantis of Baja Mar, establecimentonan cu ta consisti di hotel, time-share, condominium, den un ciudad chicito cu diberticion, restaurant, bar, club, disco, tienda, banco, waterpark, parke cu tribon y dolfijn, entretenimiento, casino, show, cultura, musica, sigui menciona numa!
E ora ey ainda ta keda como opcion e cadenanan sublime manera Zoëtry, Grand Vela, Royalton y Sandals, cu den henter Caribe ta construyendo fantastico hotelnan di luho, di berdad hotelnan di 5 strea cu e miho diseño, servicio y facilidadnan.
Profesionalnan lo keda jaloers y lo envidia esaki.
E escogencia di Bahia Principe, un cadena di hotel hopi inferior!
Ta con bo ta hinca den bo cabes pa bin cu esaki!!
Bo ta di acuerdo cu mi cu un bon futuro di turismo di Aruba ta ey mes, na nos alcance?
Dicon anto ni Otmar Oduber, ni Mike Eman, ni e resto di AVP no ta weit’e?
Ta tur ta ciego?
Remigio A. R. Wever
Ex-director ATA