Aparte di lugar cu no tin, e falta di docente tambe ta keda un reto si mira cu ya tin 30 mucha den klas awendia segun Sra. Josette Daal, directora di SKOA.
E crecemento ta bisto y SKOA ta luchando cu esaki, pa motibo cu no tin suficiente cupo pa ofrece muchanan enseñansa y no tin suficiente docente, pa yena e cuponan. Manera bisa anteriormente, segun Sra. Daal, si bay waak e ley cu ta bieuw, por bisa cu e muchanan ta tanto por bay den un klas, pero esaki ya no ta factibel. Awendia cada un mucha ta exigi un tipo di atencion. Y si haci e grupo grandi, bo ta pone hopi presion ariba e maestro di scol.
E maestro tambe ta hende, ta mucho presion pa duna les optimalmente y e ora ta crea frustracionnan. Sea ta frustracion den scol, frustracion den mayor paso tin hopi presion y expectativanan ta halto.
No por pone un docente den un siutacion asina ey. Dus e ta bira un reto cu pais Aruba mester pensa ariba dje, con ta bay acata esaki. Un solucion berdad lo ta, pa traha mas scol. Sra. Daal a sigui bisa, cu na final di añanan 90, tabata tin un flow asina caba, y e tempo ey a soluciona e problema cu trailer. E tempo ey, e gruponan den klas no tabata grandi ya cu a pone e muchanan den trailer. E no ta e miho solucion, pero e ta un solucion a corto plaso.
Kisas esey pais Aruba lo mester pensa pa wak con ta bay haci esey. Actualmente tin un escasez di maestro y SKOA pa algun aña caba ta trahando cu pensionadonan “jong”, cu te ainda ta duna nan aporte den casonan asina y segun Sra. Daal, esaki ta bon ya cu nan tin experiencia pa atende cu scol, cu maneho, etc. pero e ta keda un reto pa pais Aruba, Sra. Josette Daal, directora di SKOA a finalisa bisando.