Na Renaissance Convention Center a tuma lugar e Conferencia di Duth Caribbean Agro Visioning Process. E conferencia a conclui cu e firmamento di e acuerdo y cu 5 puntonan cardinal, unda cu Gobierno lo traha pa fortifica e colaboracion y pa adelanta na e meta cu nan kier yega pa lo cual ta trata e seguridad alimenticio. Un di e punto cu a wordo acorda ta; con nan ta bay organisa pesca den e islanan. Saba tin e miho practica y Aruba por siña for di nan y Saba lo comparti e documentonan cu Aruba y asina Aruba por organisa nan pesca di un miho forma. Tambe a palabra cu nan lo traha hunto cu tur e gruponan local pa nan por yega na un certificacion caminda nan tambe por tin e oportunidad di bende na hotel y di exporta ya cu nan producto lo ta bay tin un marca di e Gobierno di Aruba. Un di e otro palabracion ta; pa yega na e financiamento necesario pa empuhe di e sector primario y tambe a palabra pa crea un plataforma di Duth Caribbean unda nan lo bay fortifica y si Gobierno cambia e plataforma ta keda, pa asina e islanan por sigui colabora cu otro. E representantenan di e islanan Corsou, Boneiro, Saba, St. Eustasius y St. Maarten tabata sumamente contento cu e bishita realisa na Aruba pa lo cual ta trata e conferencia agricola y cu por a fortifica e lasonan pa e bienestar alimenticio.