Manera MasNoticia a bin ta señala, funcionarionan di Landsrecherche ta trahando di dia y anochi pa trata di cera e caso Avestruz prome cu eleccion.
Awe a pidi Mary Hsing pa presenta na oficina di Landsrecherche, cual el a haci cu su Abogado. A want’e pa interogacion y den oranan di atardi lo haya si e lo keda deteni of por bay cas.
Hsing tabata secretaria di Benny Sevinger, tempo cu e tabata minister den Gabinete Mike Eman II. Un persona di confiansa, trahando estrechamente cu Freddy Every, Chief of Staff di e Ministerio aki.
E investigacion ya caba a drenta un otro fase. Si inicialmente e tabata concentra riba esnan cu a haya tereno, el a sigui pa esnan cu tabatin contacto estrecho cu e beneficiarionan y awo el a yega hopi cerca di e mandatario pa cual ta pensa cu pronto lo por yega na e punto memey cu ta e ex mandatario. Practicamente tur siman tin un detencion y poco-poco e ta yegando cerca di politico mes.
Benny Sevinger mes no a wordo interoga ainda, pero si a haci dos inval na su cas. Avestruz su investigacion a cuminsa na 2017.
Ademas di Avestruz, tin caso di soborno di IBiS den cual exminister Paul Croes tabata envolvi. Y mas reciente tin investigacion caso Flamingo den cual exlider di POR y exminister Otmar Oduber ta un sospechoso.