Diamars mainta e 5 landadonan cu a crusa lama di Venezuela pa Aruba a ricibi un moneda special di Gobernador di Aruba, Su Excelencia Alfonso Boekhoudt.
Ta trata di e landadonan Gwendolin Kock, Deaxo Croes, Romar Arendsz, Davy Bisslik y Stephan Thijsen, durante un ceremonia special na Cas di Ceremonia.
E cinco landadonan dia 11 di november a landa for di e costa di Paraguana (Venezuela) pa Aruba. E evento aki cu a haya e nomber Crossing for Hope, tabata pa recauda fondo pa Koningin Wilhelmina Fonds Aruba (KWF). A logra recauda mas o menos 30 mil florin.
Pa honra e cinco atletanan aki, Gobernador a haci entrega di monedanan conmemorativo na cada un di e atletanan aki. E monedanan aki ta wordo entrega na personanan cu a resalta den comunidad. Y den e caso aki sigur, tur 5 persona a resalta.